எனது வீட்டை, ஊரில் உள்ள செல்வாக்கான படை பலமும், பணபலமும் மிக்க ஒருவர் அபகரிக்க முயலுகிறார். அதற்காக அவர் அனைத்து தவறான வழிகளையும் கையாளுகிறார். நான் வீட்டை தக்க வைத்துக்கொள்ள என்ன செய்ய வேண்டும்?

விதி என்கிற புயல் பலமாக வீசும்போது பட்டமரம் மட்டுமல்ல; பச்சை மரமும்கூட விழுந்துவிடும். உங்களின் ஜாதகத்தைப் பார்த்தபோது செவ்வாய் இருக்கும் நிலை சரியில்லை என்று தோன்றுகிறது.

பூமிக்கு உரியவன் செவ்வாயாக இருப்பதால் அதற்கான பரிகாரம் செய்து கொள்ள வேண்டியது அவசியம். பலவீனமானவர்களை பலம் மிகுந்தவர்கள் அடக்கியாள நினைப்பது என்பது எங்கும், எப்போதும் நடக்கும் விஷயம்.

அதனால் இறையருளை துணை கொள்ளுங்கள். அவர் மீதிருக்கும் உங்களின் கோபத்தின் சக்தியை அப்படியே இறைவனின் மீது பிரார்த்தனையாக திருப்புங்கள். பிரார்த்தனையை பலப்படுத்துங்கள்.

இதற்குப் பெயர்தான் தவம். தேவர்கள், அசுரர்கள் கதைகளெல்லாம் திரும்பத் திரும்ப இதுபோன்ற வாழ்க்கை விஷயங்களைத்தான் சொல்கின்றன. உங்களின் நம்பிக்கையும், உக்கிரமான எண்ணமும் எதிரியின் மனதை மாற்றும் திறன் கொண்டது.

முயற்சி உலகில் நாமே அரசர்கள். பலன் என்கிற உலகில் இறைவன் ஒருவரே அரசர். கீழே கொடுக்கப்பட்டுள்ள இந்த பூமி தேவி துதியை, துளசிச் செடி மண்ணை தாம்பாளத்தில் நிரப்பி, அதன் மேல் பசுஞ்சாணம் வைத்து 108 தடவை சொல்லுங்கள்.

அந்த மண்ணை மறுபடியும் வீட்டிலுள்ள துளசிச் செடியில் கொட்டி விடுங்கள். 12 நாட்கள் இதைச் செய்யுங்கள். பூமி உங்களை விட்டு விலகாமல் இருக்கும். கவலைப்படாதீர்கள்.

வாஞ்சிதார்த்த ப்ரதாயன்யை பூம்யை நமஹ
ஸுதாஸாக ரமத்யஸ்தாயை பூம்யை நமஹ