படப்பிடிப்பு தளத்தில் நடிகை அஞ்சலிக்கு மின்சாரம் தாக்கியது

படப்பிடிப்பின் போது நடிகை அஞ்சலி மின்சாரம் தாக்கி மயக்கமடைந்தததால் பரபரப்பு ஏற்பட்டது.

மு.களஞ்சியம் இயக்கி நாயகனாக நடித்து வரும் திரைப்படம் ‘ஊர் சுற்றி புராணம்’. இந்த படத்தில் நாயகியாக அஞ்சலி நடித்து வருகிறார். ‘கருங்காலி’ படத்திற்குப் பிறகு இந்த ஜோடி மீண்டும் இணைந்து நடிக்கும் படம் இது.

இப்படத்தின் படப்பிடிப்பு கடந்த சில தினங்களாக திருப்போரூர் வடக்கு மாடவீதியில் உள்ள தனியார் சத்திரத்தில் நடைபெற்று வருகிறது. அண்மையில் இங்கு களஞ்சியம் மற்றும் அஞ்சலி சம்மந்தப்பட்ட காட்சிகள் எடுக்கப்பட்டன.

அப்போது ஜெனரேட்டருக்கு செல்லும் மின்சார வயர் மீது நடிகை அஞ்சலி எதிர்பாராத விதமாக கால் வைத்துவிட்டார். இதில் மின்சாரம் தாக்கியதில் அவர் தூக்கி வீசியெறியப்பட்டார். இதனையடுத்து கீழே மயங்கி விழுந்த அஞ்சலியை மீட்டு உடனே அருகிலிருந்த மருத்துவமனையில் அனுமதித்தனர். அங்கு சிகிச்சைக்குப் பிறகு சகஜ நிலைக்கு திரும்பிய அவர் மீண்டும் படப்பிடிப்பு தளத்திற்கு வந்தார்.

ஆனால் படப்பிடிப்பு நிறுத்தப்பட்டதாக இயக்குனர் களஞ்சியம் அறிவித்ததை தொடர்ந்து நடிகை அஞ்சலி சென்னைக்கு புறப்பட்டுச் சென்றார். இதனால் படப்பிடிப்பு தளத்தில் சிறிது நேரம் பரபரப்பு காணப்பட்டது.