மின்சாரம் தாக்கி விபத்து: நடிகை அஞ்சலி கால் வீங்கியது- படப்பிடிப்பு மீண்டும் ரத்து

அஞ்சலி ஊர் சுற்றி புராணம் படத்தில் கதாநாயகியாக நடிக்கிறார். இப்படத்தை மு.களஞ்சியம் இயக்குகிறார். இதன் படப்பிடிப்பு திருப்போரூர் அருகே உள்ள ஒரு சத்திரத்தில் நடந்தபோது விபத்து ஏற்பட்டது. அஞ்சலி காலில் செருப்பு அணியாமல் ஒரு வீட்டுக்குள் நுழைவது போன்ற காட்சியை எடுத்தனர்.

அப்போது அறுந்து கிடந்த மின்சார வயரை அஞ்சலி மிதித்துவிட்டார். இதில் அவர் உடலில் மின்சாரம் பாய்ந்து தூக்கி வீசப்பட்டு மயங்கி விழுந்தார். இதனால் படப்பிடிப்பு குழுவினர் அதிர்ச்சி அடைந்தனர். உடனடியாக அஞ்சலியை அருகில் இருந்த தனியார் ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டது. இதையடுத்து படப்பிடிப்பு ரத்து செய்யப்பட்டது.

சிகிச்சை முடிந்து அஞ்சலி டிஸ்சார்ஜ் ஆனார். வீட்டில் ஓய்வு எடுத்து வந்தார். பூரண குணமானதையடுத்து இன்று மீண்டும் படப்பிடிப்பை தொடங்க ஏற்பாடு செய்யப்பட்டது. ஆனால் அதிகாலை படப்பிடிப்புக்கு செல்ல தயாரான போது அஞ்சலியின் கால் வீங்கி இருப்பது தெரிய வந்தது. அவரால் படுக்கையில் இருந்து கீழே இறங்கி நடக்க முடியவில்லை. வலியால் துடித்தார். இதையடுத்து இன்றும் நாளையும் படப்பிடிப்பு மீண்டும் ரத்து செய்யப்பட்டது.