என் மகனுக்கு வயது 48. திருமண தாமதத்திற்கு பெண் தெய்வ கோபம் காரணம் என கூறுகின்றார்கள். எனக்கும் செய்ய வேண்டியதைச் சொல்லி உதவ வேண்டும்.

உங்களின் கடிதத்தைப் படித்தேன். பெண் தெய்வம் கோபமாக உள்ளது என நீங்களாக நினைத்துக்கொண்டு குழம்பாதீர்கள். உங்கள் மகன் திருமணத்தை நிறுத்த வேண்டுமென்று எந்த பெண் தெய்வமும் எண்ணுவதில்லை.

எதற்கெடுத்தாலும் தெய்வ குற்றம் என்று சொல்லக் கூடாது. பெண் தேவதைகள் உபாசனை, மாந்த்ரீகத்தில் மிகத் தீவிரமாக ஈடுபட்டுள்ளோர், ஆக்கபூர்வமான பாதையிலிருந்து மாறிச் செல்லும்போது சில இடையூறுகள் ஏற்படும்.

அதுதவிர முந்தைய ஜென்ம பாவங்களாக இருக்கக் கூடுமோ எனவும் கேட்டிருக்கிறீர்கள்.

போன ஜென்மத்து பாவ, புண்ணியங்கள் இந்த ஜென்மத்திலும் உங்களை பாதிக்கின்றன என்றும் ஆனாலும் சர்வேஸ்வரன் அவற்றை மறக்கும் திறனையும் கூடவே அமைத்து விடுகிறான் என்றும் வேத நூல்கள் சொல்கின்றன. இது, இந்த ஜன்மத்தில் நிறைய நல்லது செய்ய வேண்டுமென்பதற்காகத்தான்.

நேற்று என்ன சாப்பிட்டோம் என்பதே நினைவில் இல்லாதபோது, போன ஜென்மம், அதில் செய்த பாவங்கள் பற்றியெல்லாம் நினைவிருக்க வாய்ப்பே இல்லை. ஆகவே, கவலைப்படாதீர்கள்.

ஏதேனும் பாவம் செய்துவிட்டதாக மன உறுத்தல் ஏற்படுமானால், இனிமேலாவது தெரிந்து எந்த பாவத்தையும் செய்யாதீர்கள். அதுவே போதும். விநாயகர் வழிபாட்டை மேற்கொள்ளுங்கள்.

‘விநாயகர் அகவலை’ தினமும் மூன்று முறை சொல்லுங்கள். கும்பகோணத்திற்கு அருகேயுள்ள கோவிந்தபுரம் போதேந்திர சுவாமிகளின் ஜீவ சமாதிக்கும், அங்கேயே உள்ள பண்டரிநாதர் ஆலயத்திற்கும் சென்று வாருங்கள்.