டைரக்டர் பாலசந்தருக்கு பால்கே விருது! ஜனாதிபதி இன்று வழங்குகிறார்!!

இந்திய சினிமா வளர்ச்சிக்கு பாடுபட்டதற்காக, டைரக்டர் கே.பாலசந்தருக்கு ஜனாதிபதி பிரதீபா பட்டீல் இன்று (9ம்தேதி) தாதா சாகிப் பால்கே விருதை வழங்குகிறார். சிறந்த சினிமா கலைஞர்களுக்கு தேசிய விருதுகள் வழங்கும் நிகழ்ச்சி, டில்லியில் உள்ள விஞ்ஞானபவனில் இன்று நடக்கிறது. இந்த நிகழ்ச்சியில், ஜனாதிபதி பிரதீபா பட்டீல் பங்கேற்று விருதுகளை வழங்குகிறார்.

இந்திய அரசு வழங்கும் மிக உயர்ந்த விருதுகளில் ஒன்றான `தாதா சாகிப் பால்கே விருது, 2010ம் ஆண்டுக்காக டைரக்டர் கே.பாலசந்தருக்கு வழங்கப்படுகிறது. விருதுடன் தங்க தாமரை, ரூ.10 லட்சம் ரொக்கம், மற்றும் பொன்னாடையை கே.பாலசந்தருக்கு, ஜனாதிபதி பிரதீபா பட்டீல் வழங்குகிறார். இதேபோல சிறந்த நடிகருக்கான விருது, நடிகர் தனுசுக்கு வழங்கப்படுகிறது.

இவருக்கு விருதுடன் வெள்ளி தாமரை மற்றும் ரூ.50 ஆயிரம் ரொக்கமும் கிடைக்கும். சிறந்த நடிகைக்கான விருதை, `தென்மேற்கு பருவக்காற்று படத்தில் நடித்ததற்காக, சரண்யா பொன்வண்ணன் பெறுகிறார். இவருக்கும் விருதுடன் வெள்ளித்தாமரை மற்றும் ரூ.50 ஆயிரம் ரொக்கம் வழங்கப்படும். இவர்கள் தவிர சிறந்த எடிட்டர் விருது கிஷோருக்கும், சிறந்த நடன அமைப்பாளர் விருது வி.தினேஷ்குமாருக்கும், சிறப்பு விருது இலங்கை நடிகர் ஜெயபாலனுக்கும் வழங்கப்படுகிறது.

இந்தியில் தபாங் படத்திற்கு விருது வழங்கப்படுகிறது. மலையாள நடிகர் சலீம் குமார், மராத்தி நடிகர் மிடலீ ஜக்தாப் வரத்கர் ஆகியோருக்கும் சிறந்த நடிகர் விருது வழங்கப்பட உள்ளது.