நடிகர் சௌமித்ரா சட்டர்ஜிக்கு தாதா சாகிப் பால்கே விருது

வங்காள நடிகர் சௌமித்ரா சட்டர்ஜிக்கு, வாழ்நாள் சாதனையாளர் விருதான, தாதா சாகிப் பால்கே விருது வழங்கப்படுகிறது. பிரபல சினிமா இயக்குநர் சத்யஜித்ரே, கடந்த 1959-ம் ஆண்டு இயக்கி, வெளியான 'அபூர் சன்சார்' என்ற சினிமா மூலம், திரையுலகிற்குள் நுழைந்தவர் சௌமித்ரா சட்டர்ஜி, 77. சத்யஜித்ரே இயக்கிய 14 சினிமாக்களில் கதாநாயகனாக நடித்து, அவரது ஆஸ்தான "ஹீரோ என்று அழைக்கப்பட்டார். தவிர, 'தேவி', 'சாருலதா', 'காரேபைரி' போன்ற படங்களிலும் நடித்து, ரசிகர்களின் மனங்களை கொள்ளை கொண்டார். சத்யஜித்ரே மட்டுமின்றி, தபன் சின்கா, மிரினல் சென் போன்ற மற்ற பிரபல வங்கமொழி இயக்குநர்கள் இயக்கிய சினிமாக்களிலும், இவர் நடித்துள்ளார். இந்நிலையில், திரையுலகில் முத்திரை பதித்த சட்டர்ஜிக்கு, வாழ்நாள் சாதனையாளர் விருதான, தாதா சாகிப் பால்கே விருது வழங்கப்படவுள்ளது. இது தொடர்பான அறிவிப்பு விரைவில் வெளியாகும் என தெரிவிக்கப்பட்டுள்ளது. இதுகுறித்து, சௌமித்ரா சட்டர்ஜி கூறுகையில், "எனது நடிப்பிற்கு மக்கள் வழங்கிய அங்கீகாரம் தான் இந்த விருது என்றார். கடந்த 2004-ல், இவர் பத்மபூஷன் விருது வழங்கி கவுரவிக்கப்பட்டார் என்பது குறிப்பிடத்தக்கது. வாழ்த்துகள் ஜி!