சூப்பர் ஸ்டார் என்று என்னை அழைக்க வேண்டாம்! – மம்முட்டி

மலையாள திரையுலக சூப்பர் ஸ்டார் என்று என்னை அழைக்க வேண்டாம் என்று மம்முட்டி கேட்டுக் கொண்டுள்ளார்.

இந்திய அளவில் சூப்பர் ஸ்டார் என்றால் அது ரஜினிகாந்த் மட்டுமே. ஆனாலும் அந்தந்த மொழி திரைப்பட உலகில் முன்னணியில் உள்ள நடிகர்களை சூப்பர் ஸ்டார் என சில பத்திரிகைகள் விளிக்கின்றன.

மலையாளத்தில் மம்முட்டி – மோகன் லால் இருவரையும் அதுபோல குறிப்பிடுகின்றன பத்திரிகைகள். அதே நேரம், இந்த இருவரும்தான் மலையாளத் திரையுலகம் வளராமல் பரிதாப நிலையில் இருக்கக் காரணம் என்றும், இளைஞர்களுக்கு வாய்ப்பு தர இருவரும் மறுப்பதாகவும் குற்றச்சாட்டு உள்ளது.

திலகன், வினயன் போன்றோர் இந்த இரு பெரிய நடிகர்களுக்கும் எதிராக நீண்ட நாட்களாக போராட்டமே நடத்தி வருகின்றனர்.

இந்த நிலையில் சமீபத்தில் மம்முட்டிதான் மலையாளத்தின் சூப்பர் ஸ்டார் என ஒரு காமெடி நடிகர் குறிப்பிட்டிருந்தார். இது குறித்து கருத்து தெரிவித்த மம்முட்டி, “நான் உண்மையில் சூப்பர் ஸ்டாரே கிடையாது. சூப்பர் ஸ்டார்களால்தான் மலையாளத் திரையுலகம் உருப்படவில்லை என்று சிலர் கூறிவரும் நிலையில், என்னை சூப்பர் ஸ்டார் என்று சொல்லிக் கொள்வதை விரும்பவில்லை,” என்று கூறியுள்ளார்.