விவசாயிகளுக்கு ரூ.30 லட்சம் வழங்கிய அமிதாப்பச்சன்!

விவசாயிகளின் கடன் பிரச்னையை தீர்க்க ரூ.30லட்சம் வழங்கி உதவி செய்து இருக்கிறார் பாலிவுட் சூப்பர் ஸ்டார் அமிதாப் பச்சன். மகாராஷ்டிரா மாநிலத்தில் ஏராளமான விவசாயிகள் வாங்கிய கடனை கட்ட முடியாமல் தற்கொலை செய்து வருவது நாளுக்கு நாள் அதிகரித்து வருகிறது. இத்த‌கவலை கேட்ட பாலிவுட் நடிகர் அமிதாப் பச்சன் அவர்களுக்கு உதவ முன் வந்து இருக்கிறார்.

மகாராஷ்டிராவின் விதர்பா பகுதியில் உள்ள சுமார் 20 கிராமங்களை சேர்ந்த 114 விவசாயிகளின் கடன்களை அடைக்க ரூ.30 லட்சத்திற்கான காசோலையை வழங்கி இருக்கிறார் அம‌ிதாப். விதர்பாவில் நடந்த இதற்கான விழாவில் அத்தொகுதியை சேர்ந்த எம்.பி. தத்தா மேகே உரிய விவசாயிகளிடம் வழங்கினார். நிகழ்ச்சியில் பங்கேற்காத சில விவசாயிகளுக்கு அவரது வீடுகளுக்கே நேரடியாக சென்று வழங்கியுள்ளனர் அதிகாரிகள். தற்கொலை செய்யும் அளவுக்கு போன விவசாயிகளுக்கு அமிதாப், பணம் கொடுத்து உதவியது அவர்களுக்கு பெருமகிழ்ச்சியாக உள்ளது

இதனிடையே‌ மகாராஷ்டிராவில் விவசாயிகளுக்கு அமிதாப் உதவியை செய்ததை அடுத்து, உ.பி.யில் உள்ள விவசாயிகள், தங்களுக்கும் உதவ வேண்டும் என்று அவருக்கு கடிதம் அனுப்பியுள்ளனர்.