சுந்தர்.சி இயக்கும் தீயா வேலை செய்யணும் குமாரு

சமீபகாலமாக தமிழ் சினிமாக்களில் தலைப்புக்கு ரொம்ப பஞ்சமாகிவிட்டது. இதனால் பழைய பட தலைப்புகள் மீண்டும் இப்போது உருவாகி வரும் படங்களுக்கு வைக்கப்பட்டு வருகிறது. இன்னொரு பக்கம் வித்தியாசமான தலைப்புகளை அதிகமாக வைக்க தொடங்கிவிட்டனர். அந்தவகையில் அட்டகத்தி, யாருடா மகேஷ், கண்ணா லட்டு திண்ண ஆசையா, ஹாய் டா உள்ளிட்ட பட தலைப்புகளின் வரிசையில் இப்போது புதிதாக சேர்ந்திருக்கும் தலைப்புதான் “தீயா வேலை செய்யணும் குமாரு…” சுந்தர்.சி தான் இப்படியொரு தலைப்பை தனது படத்திற்கு வைத்திருக்கிறார்.

கலகலப்பு படத்தை தொடர்ந்து தற்போது விஷாலை வைத்து இயக்கி வரும் மத கஜ ராஜா படத்தை அடுத்து இயக்க போகும் புதிய படத்தின் தலைப்பு தான் இது. இப்படத்தில் பாய்ஸ் நாயகன் சித்தார்த் ஹீரோவாகவும், ஹன்சிகா மோத்வானி ஹீரோயினாகவும் நடிக்கின்றனர். இவர்கள் இருவரும் தமிழில் இணையும் முதல்படம் இது. ஏற்கனவே இவர்கள் தெலுங்கில் ஓ மை பிரண்ட் என்ற படத்தில் ஜோடி சேர்ந்து நடித்துள்ளனர். சித்தார்த்-ஹன்சிகாவுடன் சந்தானமும் இப்படத்தில் நடிக்கிறார். தற்போது படத்திற்கான பிற கலைஞர்கள் தேர்வு நடந்து வருகிறது. விரைவில் படப்பிடிப்பு துவங்க உள்ளது. சுந்தர்.சி.யின் மனைவி குஷ்பு இப்படத்தை தயாரிக்கிறார். பொதுவாக சுந்தர்.சி படம் என்றாலே காமெடிக்கு குறை இருக்காது. அதேப்போல் இப்படமும் காமெடி படமாக உருவாக இருக்கிறது.