தமிழ் படத்தில் அமிதாப்?

இயக்குநர் பாலகிருஷ்ணன் எடுக்க திட்டமிட்டுள்ள தமிழ் படத்தில் அமிதாப் பச்சன் முக்கிய வேடத்தில் நடிக்க வைக்க பேச்சுவார்த்தைகள் நடந்து வருகிறது. பேச்சுவார்த்தை வெற்றி பெற்றால், தமிழ் படத்தில் அமிதாப் நடிப்பார் என்று இயக்குநர் கூறுகிறார்.

இந்தியாவை அடிப்படுத்தி வைத்திருந்த இங்கிலாந்துடன் நாம் இப்போது உறவு கொண்டாடுகிறோம், நமது மண்ணோடு மண்ணாக இருந்த பாகிஸ்தானுடன் பகைமை பாராட்டுகிறோம். இதற்குக் காரணம் பயங்கரவாதம் என்ற ஒரு விஷயம். இதை மையக் கருவாக வைத்து எனது அடுத்தப் படத்தை இயக்க உள்ளேன் என்கிறார் பாலகிருஷ்ணன்.

தமிழகத்தின் முன்னாள் முதலமைச்சர் காமராஜரின் வாழ்க்கை வரலாற்றை காமராஜ் என்ற பெயரில் படம் எடுத்து இயக்குநராக அறிமுகமான பாலகிருஷ்ணன் தற்போது முதல்வர் மகாத்மா என்ற படத்தை இயக்கி வெளியீட்டிற்காக தயாராக வைத்துள்ளார். இப்படத்தை ஹிந்தியில் வெல்கம் பேக் காந்தி என்ற பெயரில் வெளியிடவும் திட்டமிட்டுள்ளார்.