திரைப்பட கதாசிரியர் கலைமணி காலமானார்

சென்னை, ஏப். 3: பிரபல திரைப்பட கதாசிரியரும் இயக்குநருமான கலைமணி (62) சென்னையில் திங்கள்கிழமை காலமானார்.

சென்னை தியாகராய நகரில் குடும்பத்தாருடன் வசித்து வந்த கலைமணி சில ஆண்டுகளாக நுரையீரல் புற்று நோயால் அவதிப்பட்டு வந்தார். அதற்காக சிகிச்சை மேற்கொண்டு வந்த நிலையில் அவருடைய உடல் நிலை திடீரென பாதிக்கப்பட்டு திங்கள்கிழமை இரவு காலமானார்.

பாரதிராஜா இயக்கத்தில் கமல், ரஜினி நடித்த "16 வயதினிலே' படத்தின் மூலம் தமிழ்த் திரையுலகில் கதாசிரியராக அறிமுகமானார் கலைமணி. அதன் பிறகு "மண் வாசனை', "கோபுரங்கள் சாய்வதில்லை', "பிள்ளை நிலா', "இங்கேயும் ஒரு கங்கை', "முதல் வசந்தம்', "சிறைப்பறவை', "மனைவி சொல்லே மந்திரம்' உள்பட 90-க்கும் மேற்பட்ட திரைப்படங்களுக்கு வசனம் எழுதியுள்ளார். விஜய் நடித்த "குருவி' படத்துக்கு கடைசியாக வசனம் எழுதியிருந்தார்.

எவரெஸ்ட் என்ற திரைப்பட நிறுவனம் சார்பில் "கோபுரங்கள் சாய்வதில்லை', "இங்கேயும் ஒரு கங்கை', "மல்லுவேட்டி மைனர்", "என் புருஷன்தான் எனக்கு மட்டும்தான்' உள்பட 16 படங்களைத் தயாரித்துள்ளார்.

"தெற்கத்தி கள்ளன்', "எங்க ஊர் ராசாத்தி', "மனித ஜாதி', "பொறுத்தது போதும்' போன்ற படங்களை இயக்கியுள்ளார். கலைமாமணி உள்பட ஏராளமான விருதுகளைப் பெற்றுள்ளார். அவருக்கு சரஸ்வதி என்ற மனைவி உள்ளார். மறைந்த கலைமணியின் உடலுக்கு தமிழ்த் திரையுலகைச் சேர்ந்த ஏராளமானோர் இறுதி அஞ்சலி செலுத்தினர். அவருடைய இறுதிச் சடங்கு சென்னையில் செவ்வாய்க்கிழமை நடைபெற்றது.