கமல் இயக்கும் ஹாலிவுட் திரைப்படம் 'ஆல் ஆர் கின்'

கமல் ஹாசன் இயக்கும் ஹாலிவுட் திரைப்படத்துக்கு "ஆல் ஆர் கின்" என பெயரிடப்பட்டுள்ளது.

அண்மையில் கமல் நடிப்பில் வெளியான விஸ்வரூபம் திரைப்படம் மிகப்பெரிய வெற்றி பெற்றுள்ளது. அனைத்து தரப்பினரிடம் இருந்து கமலுக்கு பாராட்டுகள் குவிந்து வருகின்றன. மேலும் வசூலிலும் எதிர்பார்த்ததைவிட சாதனை படைத்து வருகிறது. விஸ்வரூபம் படத்தை தொடர்ந்து விஸ்வரூபம் இரண்டாம் பாகத்தையும் இந்தாண்டுக்குள் வெளியிட கமல் தீவிரம் காட்டி வருகிறார். இந்த இரண்டாம் பாகத்தை இன்னும் மூன்றே மாதங்களில் வெளியிடவிருக்கிறார்.

இதனைத்தொடர்ந்து பேரி ஆஸ்போன் தயாரிக்கும் ஹாலிவுட் திரைப்படத்தை இயக்குகிறார். இப்படத்திற்கு "ஆல் ஆர் கின்" என பெயரிடப்பட்டுள்ளது. "ஆல் ஆர் கின்" என்றால் "யாவரும் கேளீர்" என்று அர்த்தமாம். இதன் கதை இந்திய கலாச்சாரத்தை அடிப்படையாகக் கொண்டது என கூறப்படுகிறது. முன்னதாக விஸ்வரூபம் திரைப்படத்தை பார்த்த ஹாலிவுட் தயாரிப்பாளர் பேரி ஆஸ்போன், கமலிடம் தனக்கு ஒரு படம் இயக்கும்படி வேண்டுகோள் விடுத்தார். அதன்படி "ஆல் ஆர் கின்" எனும் திரைப்படத்தை கமல் இயக்கவிருப்பது குறிப்பிடத்தக்கது.