கமல்ஹாசன் இன்று சென்னை திரும்புகிறார்

விஸ்வரூபம் பட பிரச்சினை தொடர்பாக நடிகர் கமல்ஹாசனும், முஸ்லிம் அமைப்புகளும் ஒன்றாக அமர்ந்து பேசி சுமுக தீர்வுகாண முன்வந்தால் அதற்கு தேவையான அனைத்து உதவிகளையும் அரசு செய்யும் என்று முதல்- அமைச்சர் ஜெயலலிதா நேற்று முன்தினம் சென்னை கோட்டையில் பேட்டி அளித்தபோது தெரிவித்தார்.

இதையடுத்து முஸ்லிம் அமைப்புகளின் கூட்டமைப்பு ஒருங்கிணைப்பாளர் முகமது அனீபா உள்ளிட்டவர்களும், கமல்ஹாசனின் அண்ணன் சந்திரஹாசனும் நேற்று தலைமைச் செயலகத்திற்கு வந்து, உள்துறை முதன்மைச் செயலாளர் ராஜகோபாலை சந்தித்தனர்.

சென்னை போலீஸ் கமிஷனர் ஜார்ஜ், கூடுதல் கமிஷனர் தாமரைக் கண்ணன் ஆகியோர் இதில் கலந்து கொண்டனர். பின்னர் வெளியே வந்த முகமது அனீபா நிருபர்களிடம் கூறுகையில், முதல்-அமைச்சர் ஜெயலலிதாவின் வேண்டுகோளை ஏற்று, முஸ்லிம் இயக்கங்கள் இந்தப் பேச்சுவார்த்தைக்கு தயாராக இருப்பதாக உள்துறை முதன்மைச் செயலாளரை சந்தித்து கடிதம் கொடுத்தோம்.

முஸ்லிம் அமைப்புகள் சார்பில் 15 பேரும், கமல்ஹாசன் தரப்பில் 5 பேரும் இந்தபேச்சுவார்த்தையில் கலந்து கொள்ள இருக்கின்றோம். இன்று மாலை 6 மணிக்கு பேச்சுவார்த்தை நடைபெறும் என்று தெரிவித்தார். அதன்படி, முஸ்லிம் அமைப்பினரும், கமல்ஹாசன் தரப்பினரும் நேற்று மாலை 6 மணியளவில் தலைமைச் செயலகத்திற்கு வந்தனர்.

அப்போது, இந்த பேச்சுவார்த்தையில் விஸ்வரூபம் படத்தின் இயக்குநர் என்ற முறையில் நடிகர் கமல்ஹாசனும் கலந்து கொள்ள வேண்டும் என்று முஸ்லிம் அமைப்பினர் கேட்டுக் கொண்டதாக தெரிகிறது. இதைத் தொடர்ந்து சமரச பேச்சு தள்ளிவைக்கப்பட்டது. இதுகுறித்து கமல்ஹாசன் தரப்பில் கூறுகையில், மும்பையில் விஸ்வரூபம் படம் திரையிடப்பட்டுள்ளது.

அது தொடர்பாக நடிகர் கமல்ஹாசன் மும்பையில் உள்ளார். சென்னையில் நடைபெறும் பேச்சுவார்த்தையில் கமல்ஹாசன் இருந்தால் சவுகரியமாக இருக்கும் என கூறுகிறார்கள் என்று தெரிவித்தனர். மும்பையில் இருந்து கமல்ஹாசன் இன்று (சனிக்கிழமை) பகல் 11.40 மணிக்கு சென்னை திரும்புகிறார். பிற்பகல் 2 மணிக்கு அவர் உள்துறை முதன்மை செயலாளரை சந்தித்து பேசுகிறார்.