ஹீரோ ஆனார் பாலசந்தர் வீட்டு செக்யூரிட்டி

பாலசந்தர் வீட்டு செக்யூரிட்டி ஹீரோவாக நடிக்கிறார். புதுமுகம் அஸ்வின் பாலாஜி, ரோஸின் ஜாலி, ஜோதிஷா நடிக்கும் படம் ‘கல்லாப்பெட்டி. ரா ரா இயக்குகிறார். பி.எஸ்.கருணாநிதி தயாரிப்பு. சபேஷ் முரளி இசை. இப்படத்தின் பாடல் ஆடியோவை டைரக்டர் கே.பாலசந்தர் நேற்று வெளியிட்டு பேசியதாவது: இன்றைய காலகட்டத்தில் இளைஞர்கள் வித்தியாசமான கதைகளுடன் அணி அணியாக சினிமாவுக்கு படை எடுத்து வருகிறார்கள். இப்படியொரு காலம் வராதா என்று அந்த காலத்தில் நான் எதிர்பார்த்திருக்கிறேன். நான் படங்கள் இயக்கிய ஆரம்ப காலகட்டங்களில் என்னை வரவேற்க யாரும் இல்லை.

ஆனாலும் தொடர்ந்து படங்களை இயக்கினேன். இன்றைக்கு இளைஞர்களுக்கு நல்ல வரவேற்பு கிடைக்கிறது. கல்லாப்பெட்டி படத்தில் நடிக்கும் ஹீரோ அஸ்வின் பாலாஜி என் வீட்டில் கடந்த 6 வருடத்துக்கு முன் செக்யூரிட்டியாக பணியாற்றியவர். அப்போதே அவர் ஓய்வு நேரங்களில் கவிதைகள் எழுதுவார். பின்னர் கமல்ஹாசன் வீட்டிற்கு செக்யூரிட்டியாக சென்றார். சினிமாவில் ஒருவர் ஹீரோவாக வரவேண்டுமென்றால் எவ்வளவு போராட வேண்டி இருக்கிறது என்பது எல்லோருக்கும் தெரியும். செக்யூரிட்டியாக வேலை பார்த்துக்கொண்டு இன்று ஹீரோவாக நடிக்கிறார் என்றால் அதற்கு எவ்வளவு கடுமையாக முயன்றிருப்பார் என்பதை உணர வேண்டும் என்றார்.