லண்டன் மாஸ்டர்ஸ் டென்னிஸ்: இறுதியாட்டத்தில் பூபதி-போபன்னா

லண்டனில் நடந்துவரும் ஏடிபி வொர்ல்ட் டூர் ஃபைனல் என்று சொல்லப்படும் வருடத்தின் கடைசி மாஸ்டர்ஸ் பந்தயத்தில் ஆடவர் இரட்டையர் பிரிவில் இந்தியாவின் மகேஷ் பூபதி மற்றும் ரோஹன் போபன்னா ஜோடி இறுதியாட்டத்துக்கு தகுதி பெற்றுள்ளது.

ஞாயிறன்று நடந்த அரையிறுதிப் போட்டியில் இந்தியாவின் லியாண்டர் பயெஸ் மற்றும் செக் குடியரசின் ரதெக் ஸ்டெஃபானெக் ஜோடியை 4-6, 6-1, 12-10 என்ற செட் கணக்கில் பூபதி போபன்னா ஜோடி வீழ்த்தியது.

கடந்த மாதம் ஷாங்காய் மாஸ்டர்ஸ் பந்தயத்தில் இறுதி ஆட்டத்தில் பயெஸ்-ஸ்டெஃபானக் ஜோடியிடம் தோற்றிருந்த பூபதி-போபன்னா ஜோடி அதற்கு பழிதீர்க்கும் விதமாக ஞாயிறன்றைய ஆட்டத்தை கடுமையாகப் போராடி வென்றனர்.

இறுதியாட்டத்தில் பூபதி போபன்னா ஜோடி வெற்றி பெறுவார்களானால் 1977ஆம் ஆண்டு விஜய் அமிர்தராஜ் பெற்ற வெற்றிக்குப் பின்னர் வருடக் கடைசியில் நடக்கும் மாஸ்டர்ஸ் போட்டியில் இந்தியாவுக்கு கிடைத்த வெற்றியாக அது அமையும்.