சுந்தர் சி. படத்தில் கணேஷ் வெங்கட்ராமன்

அபியும் நானும் படத்தில் ஹீரோவாக அறிமுகமான கணேஷ் வெங்கட்ராமனுக்கு உன்னைப்போல் ஒருவன் நல்ல விலாசமாக அமைந்தது. ஆனால் அடுத்தடுத்து இவருக்கு ச‌ரியான வாய்ப்புகள் அமையவில்லை. ஹீரோவாக நடித்த பனித்துளி பெயரைப் போலவே நிமிடத்தில் கரைந்து போனது சோகம்.

தெலுங்கில் அவ்வப்போது சில படங்கள் அவருக்கு கிடைக்கிறது. சமீபத்தில் அவருக்கு பாராட்டை பெற்றுத் தந்தது நாகார்ஜுனின் தம்மருகம். இதில் கணேஷ் வெங்கட்ராமன்தான் வில்லன்.

தமிழில் நீண்ட இடைவெளிக்குப் பிறகு ஒரு படம் இவருக்கு கிடைத்துள்ளது. சுந்தர் சி. இயக்கும் தீயா வேலை செய்யணும் குமாரு. இதில் சித்தார்த் ஹீரோ, ஹன்சிகா மோத்வானி ஹீரோயின். மூன்று ஐடி துறை இளைஞர்களைப் பற்றியதாம் கதை. அதில் ஒரு ஐடி-யாக கணேஷ் வெங்கட்ராமனை கமிட் செய்திருப்பதாக செய்தி.

கட்டுமஸ்தான நடிகருக்கு சுந்தர் சி-யின் காமெடி படம் பிரேக் தருமா?
கணேஷ் வெங்கட்ராமன், சுந்தர் சி