நாளை சபரிமலை நடை திறப்பு

மாசி மாத பூஜைகளுக்காக சபரிமலை ஐயப்பன் கோயில் நடை பிப்ரவரி 12ஆம் தேதி (நாளை) திறக்கப்படுகிறது.

13ஆம் தேதி முதல் 17ஆம் தேதி வரை 5 நாட்கள் வழக்கமான பூஜைகளுடன் படி பூஜை உட்பட சிறப்பு பூஜைகளும் நடைபெறும்.

மகர விளக்கு பூஜைகளுக்குப் பின்னர் சபரிமலையில் நடை ஜனவரி 20ஆம் தேதி சாத்தப்பட்டது. இதன் பின்னர மாசி மாத பூஜைக்காக கோயில் நடை திறக்கப்படுகிறது.

நாளை மாலை 5.30 மணியளவில் தந்திரி கண்டரரு ராஜீவரரு முன்னிலையில் மேல்சாந்தி விஷ்ணு நம்பூதிரி நடை திறந்து ஐயப்பனுக்கு தீபாராதனை நடத்துவார்.

நாளை வேறு பூஜைகள் எதுவும் நடைபெறாது. 13ஆம் தேதி முதல் 17ஆம் தேதி வரை தினமும் கணபதி ஹோமம், உஷ பூஜை, உச்சிகால பூஜை மற்றும் இரவு பூஜை ஆகிய வழக்கமான பூஜைகளுடன் படி பூஜை, உதயாஸ்தனமன பூஜை ஆகிய சிறப்பு பூஜைகளும் நடத்தப்படும். இந்த நாட்களில் பக்தர்கள் நெய்யபிஷேகமும் செய்யலாம்.

5 நாள் பூஜைகளுக்குப் பின்னர் 17ஆம் தேதி இரவு 10 மணிக்கு கோயில் நடை சாத்தப்படும். இந்த தகவலை கோயில் நிர்வாகம் தெரிவித்துள்ளது.