இதய அறுவை சிகிச்சை செய்து பல வருடங்கள் ஆகிவிட்டன. ஆனாலும், மீண்டும் பிரச்னை வந்து மருத்துவரிடம் சென்றபோது ஆஞ்சியோ பிளாஸ்ட் செய்ய வேண்டும் என்று கூறிவிட்டார். இதற்கு பரிகாரம் ஏதேனும் உள்ளதா?

இதுபோன்ற பிரச்னைகளுடன் நிறைய கடிதங்கள் வருகின்றன. எல்லோருடைய சார்பாகவும் இதை படிக்கலாம். எல்லா பிரச்னைகளுக்கும் இரு வடிவங்கள் உண்டு. ஒன்று ஸ்தூலம். மற்றொன்று சூட்சுமம். இப்போது உங்களுக்கு மருத்துவர் என்னென்ன ஆலோசனைகள் சொல்கிறாரோ, அவற்றை முதலில் செய்யுங்கள். அதில் வெற்றியை இறைவன் ஏற்படுத்துவார். ‘தெய்வேன மநுஷ ரூபேயா’ என்பது பெரிய அர்த்தம் உடைய வாக்கியம்.

மருத்துவர்களே, ‘‘நாங்க ரொம்ப பயந்தோம். கடவுள் அருளால நீங்க பிழைச்சிட்டீங்க’’ என்று சொல்வதை அடிக்கடி கேட்கிறோம் அல்லவா? இதயம் சம்பந்தப்பட்ட நோய்களிலிருந்து பூரண குணம் பெறுவதற்கென்றே ஓர் ஆலயம் உள்ளது. அந்த தலத்திற்கு திருநின்றவூர் என்று பெயர். இத்தலம் சென்னை-திருவள்ளூருக்கு அருகில் உள்ளது.

இறைவனின் திருப்பெயரே இருதயாலீஸ்வரர். பூசலார் நாயனார் மானசீகமாகக் கட்டிய ஆலயத்தில் உறைந்த சிவபெருமான் இவர். இந்த ஈசனை நிறைய வில்வங்களால் அர்ச்சனை செய்துவிட்டு வாருங்கள். இதயத்தில் பிரச்னை உள்ளது என்று நினைப்போரும், இனி தனக்கு வரக்கூடாது என்று பிரார்த்திப்போரும்கூட இத்தலத்திற்கு சென்று வரலாம். வீட்டில் பைரவர் படத்தை வைத்து அதன்முன் கீழ்க்காணும் ஸ்லோகத்தைச் சொல்லுங்கள்:

வடுகம் பாது ஹ்ருதயே ஆபதுத்தாரணாயச விச்வநாதஸ் ஸதாபாது ஸர்வாஸ்கே மம ஸர்வதா - என்று சொல்லி பிரார்த்தனை செய்து கொள்ளுங்கள். கீழேயுள்ள ஸ்லோகத்தை சொல்லி மூன்று இதழ்கள் கொண்ட வில்வத்தால் அர்ச்சியுங்கள். இறுதியில் எள் சாதத்தை நிவேதனம் செய்யுங்கள்.

அஸிதாங்க பைரவாய நமஹ
ருருபைரவாய நமஹ
சண்ட பைரவாய நமஹ
க்ரோத பைரவாய நமஹ
உன்மத்த பைரவாய நமஹ
கபால பைரவாய நமஹ
பீஷண பைரவாய நமஹ
ஸம்ஹார பைரவாய நமஹ