பத்த பத்மாசனம் பத்த பத்மாசனம்

செய்முறை....

பத்த பத்மாசனம் என்பது பத்மாசனத்தின் ஒரு வகை ஆகும். ஒரு விரிப்பின் மீது அமர்ந்தபடி கால்கள் இரண்டையும் நன்கு நீட்டிக் கொள்ளுங்கள். பிறகு வலது காலை மடித்து இடது தொடை மீது வைத்துக் கொள்ளுங்கள். அதே போல இடது காலை மடித்து வலது தொடை மீது வையுங்கள்.

அதன்பின்னர் முதுகின் பின்புறம் கைகளைக் கொண்டு போய் வலது கையின் முதல் 3 விரல்களால் வலதுகால் கட்டை விரலையும், இடது கையின் முதல் 3 விரல்களால் இடது கால் கட்டை விரலையும் நன்றாகப் பிடித்துக் கொள்ளுங்கள்.

இதன் பிறகு முகவாய்க் கட்டையை மார்பின் மேல் ஒட்டி வைத்து புருவ மத்திப் பகுதிக் கண்களை மூடி பார்வையைச் செலுத்தி ஓம், ஓம் என்று உச்சரித்து தியானம் செய்யுங்கள். (உங்கள் மனதுக்கு பிடித்தமான மந்திரத்தை சொல்லலாம்) ஐந்து நிமிடம் முதல் பத்து நிமிடம் வரையாவது இதுபோன்று அமைதி நிலையில் இருந்தால் அபாரமான பலன்கள் கிட்டும்.

எப்பேர்பட்ட பிரச்சினைகளும் அற்புதமான வழிகளில் தீர்ந்து விடுவதை நீங்களே அனுபவரீதியாக உணருவீர்கள். இந்த ஆசனத்தை செய்யும்போது உட்கார்ந்த நிலையில் உடம்பை நேரான நிலையில் வைத்து நன்றாக நிமிர்வது மிகவும் அவசியம்.

சாதாரண மூச்சுக் கூட போதுமானது. என்றாலும் பிராணாயாம முறைப்படி மூச்சிழுத்து வெளியே விட்டால் இன்னும் அதிக பலன்கள் கிடைக்கும்.

பலன்கள்....

இந்த ஆசனத்தினால் அடிவயிற்றில் ஏற்படக் கூடிய சகல விதமான நோய்களும் பறந்து விடும். முக்கியமாக சொல்வதானால் மூலம், பவுத்திரம், அல்சர், வயிற்றில் விட்டு விட்டு வரும் வலிகள் யாவும் மறைந்து விடும். இதை கர்ப்பிணி பெண்கள் தவிர்த்து மற்ற பெண்கள் செய்யலாம்.