என் வயது 70. என் மகளுக்கு 34 வயதாகிறது. இன்னும் திருமணம் கை கூடாமல் தட்டிப்போகிறது. எனக்கு பிறகு அவளது வாழ்வென்ன ஆகுமோ என்கிற கவலையே என்னை பெரிதும் வருத்துகிறது. அவளுக்கு விரைவில் திருமணம் நடக்கவும் எனக்கு மன நிம்மதி கிடைக்கவும் தக்க பரிகாரம் சொல்லுங்கள்

நேரம், காலம் வந்துவிட்டால் வேண்டாமென்றாலும் கல்யாணம் நிற்காது. இப்போது திருமணத்திற்கான காலம் வந்துள்ளது. ஜாதகம் பார்க்கும்போது முக்கிய பொருத்தங்கள் இருக்கின்றனவா என்று பாருங்கள். கூடிய விரைவில் திருமணம் நடந்து விடும்.

சூரிய பகவானை மனதில் நினைத்து தினமும் 108 தடவை கீழேயுள்ள ஸ்லோகத்தை சொல்லி வணங்குங்கள்

நமஸ்தே கமலாநாத! நமஸ்தே கமலப்ரிய!
நம: கமல நாதாய பாஸ்கராய நமோநம:

வயதாக வயதாக உடம்பு உங்கள் சொல் பேச்சைக் கேட்காது. ஆனால், மனது கொஞ்சம் கட்டளையிட்டு இழுத்துப் பிடித்தால் கேட்கும். மிதமான உணவை உடலுக்கு கொடுங்கள். கனமான ஆன்மிக விஷயங்களை மனதுக்கு கொடுங்கள்.

யானை இடதும், வலதும், மேலும், கீழும் ஆடிக் கொண்டே இருக்கும். ஆனால், சிறிய இரும்புச் சங்கிலியை தும்பிக்கையில் கொடுத்து விட்டால் அதைப் பிடித்துக் கொண்டு அப்படியே நிற்கும். எனவே, மனதில் கவலைகள் இருந்தால் இருக்கட்டும்.

‘கவலையே போ’ என்றால் போகாது. ஆனால், இரும்புச் சங்கிலிபோல ஏதேனும் இறைவனின் திருநாமத்தை சொல்லிக் கொண்டே இருங்கள். வேதம் படித்தவரிடம் மந்திர உபதேசம் பெற்றுக் கொள்ளுங்கள்.

வேறு எந்த வேலையும் இனி இல்லை என்பதுபோல மனது மறந்தாலும், மீண்டும் மீண்டும் இழுத்துப் பிடித்து சொல்லுங்கள். பிறகு பாருங்கள்... ஒரே கல்லில் இரண்டு மாங்காய் மாதிரி, மகளுக்கும் நிம்மதியான மண வாழ்க்கை அமைந்து, நீங்களும் அமைதியாக இருப்பீர்கள்.