என் கணவருக்கு மிக அதிகமாகக் குடிப்பழக்கம் உள்ளது. ஆனால் அவர் மிகவும் நல்லவர். எந்த ஜென்மத்தில் என்ன பாவம் செய்தோமோ எங்கள் குடும்பம் பாதிப்படைந்துள்ளது. இதிலிருந்து மீள ஏதாவது பரிகாரம் இருந்தால் சொல்லுங்களேன்.

மிகவும் நல்லவர்; கர்மவினையால் மது என்ற அரக்கன் பிடியில் சிக்கி விட்டாரே என துடிக்கிறீர்கள். இல்லறமே நல்லறமென நடத்தும் உங்களுடைய கஷ்டம் புரிகிறது.

உணவே மருந்தாக இருந்துவிட்டால் டாக்டர் தரும் மருந்தை சாப்பிட வேண்டிய அவசியம் வராது. வேப்பிலை, எலுமிச்சம்பழம் இரண்டிற்குமே மனோ நிலையை சரி செய்யும் ஆற்றல் உண்டு என்று ஆயுர்வேத நூல்கள் பரிந்துரைக்கின்றன.

ஆகையால் இரண்டையும் வற்புறுத்தி அடிக்கடி சாப்பிடச் செய்யுங்கள். குளிர்ந்த நீரிலும், குளம், நதியில் சில மணி நேரம் அமர்ந்து நீராடச் செய்யுங்கள். முருகனுக்கு அபிஷேகம் செய்த விபூதியை உடம்பில் பூசிக் கொள்ளச் சொல்லுங்கள்.

உங்கள் கணவர் பார்வை படும் இடங்களில் எல்லாம் கடவுள் படங்களை வையுங்கள். குடும்பத் தலைவர் செய்யும் இந்த அறம் பிறழ்ந்த செயல், குடும்பத்தார் அனைவரையும் சித்ரவதை செய்வது போலல்லவா இருக்கிறது.

அவரையே நம்பி அவருடன் வாழ வந்திருக்கும் உங்களுக்கு இப்போதுதான் பொறுப்பு அதிகம். சைவ சாப்பாட்டோடு, பாகற்காய், நெல்லிக்காயை அதிகம் சாப்பிடச் செய்யுங்கள்.

நல்லெண்ணெய் விளக்குகளை செவ்வாய், வெள்ளிக்கிழமைகளில் வீட்டு பூஜையறை, வீட்டின் முன்பகுதி மற்றும் பின்பகுதியில் ஏற்றி வையுங்கள். ‘துர்காம் தேவீம் சரணமஹம் ப்ரபத்யே’ எனும் மந்திரத்தை எப்போதும் சொல்லுங்கள்.

உங்கள் கணவர் நிச்சயம் குடியை மறந்து குடும்ப நலன் காப்பார்.