மதுரை மீனாட்சி அம்மன் கோவிலில் சித்திரை திருவிழா: ஏப்ரல் 14-ந்தேதி கொடி ஏற்றம்

மதுரையில் நடைபெறும் விழாக்களில் முக்கிய விழாவாக கருதப்படுவது சித்திரை திருவிழாவாகும். இவ்விழா மதுரை மீனாட்சி அம்மன் கோவிலில் ஒவ்வொரு ஆண்டும் கோலாகலமாக கொண்டாடப்படுவது வழக்கம்.

அதன்படி இவ்வாண்டு கோடை வசந்த விழா கடந்த 17-ந்தேதி தொடங்கி நடந்து வருகிறது. இந்த நிலையில் சித்திரை திருவிழா வருகிற ஏப்ரல் மாதம் 13-ந்தேதி (சனிக்கிழமை) தொடங்குகிறது. இதையடுத்து 14-ந்தேதி தமிழ் வருட பிறப்பன்று சித்திரை திருவிழா கொடி ஏற்றத்துடன் தொடங்குகிறது.

பின்னர் ஒவ்வொரு நாளும் சுவாமி, அம்மனுக்கு பல்வேறு அபிஷேக ஆராதனைகள் நடைபெறும். 21-ந்தேதியன்று மீனாட்சி அம்மனுக்கு பட்டாபிஷேக விழாவும், 22-ந்தேதி திருக்கல்யாணமும், 24-ந்தேதி மாசி வீதிகளில் தேரோட்டமும், 25-ந்தேதி சித்ரா பவுர்ணமியன்று திருவிழா நிறைவடைகிறது.

மீனாட்சி-சுந்தரேசுவரர் திருக்கல்யாணம் நடைபெறுவதை முன்னிட்டு கோவிலில் உள்ள திருக்கல்யாண மண்டபம் ரூ.25 லட்சம் செலவில் புதுப்பிக்கும் பணி துரிதமாக நடந்து வருகிறது. விழாவிற்கான ஏற்பாடுகளை கோவில் நிர்வாகம் செய்து வருகிறது.