மயிலை ஆதிகேசவ பெருமாள் கோயிலில் தேரோட்டம்

்

மயிலை ஆதிகேசவ பெருமாள் கோயிலில் தேரோட்டம்சென்னை: சென்னை மயிலை ஆதிகேசவ பெருமாள் பேயாழ்வார் கோயில் ஸ்ரீ மயூர வள்ளி சமேத ஆதிகேசவ பெருமாள் மகோத்ஸவத்தை முன்னிட்டு தேரோட்டம் நடந்தது. ஆயிரக்கணக்கான பக்தர்கள் கலந்து கொண்டு கோவிந்தா கோவிந்தா கோஷம் முழங்க தேரை வடம் பிடித்தனர். சென்னை மயிலை ஆதிகேசவ பெருமாள் பேயாழ்வார் கோயில் ஸ்ரீ மயூரவள்ளி சமேத ஆதிகேசவ பெருமாள் மகோத்ஸவம் கடந்த 28ம் தேதி கொடியேற்றத்துடன் தொடங்கியது.

தொடர்ந்து புன்னை மர வாகனம், சேஷவாகனம், சிம்ம வாகனம், ஹம்ச வாகனம், ஆகிய வாகனங்களில் பெருமாள் புறப்பாடு நடந்தது. 31ம் தேதி சூரிய பிரபை மற்றும் சந்திர பிரபை நடந்தது.1ம் தேதி காலை 6 மணிக்கு பல்லக்கில் பெருமாள் எழுந்தருளினார். 2ம் தேதி ரத கலச பிரதிஷ்டை, சூர்ணாபிஷேகம், புண்ணியகோடி விமானம், நடந்தது. தொடர்ந்து இன்று 3ம் தேதி காலை தேரோட்டம் நடந்தது. முன்னதாக காலை மயூர வள்ளி சமேத ஆதிகேசவ பெருமாள் மேள தாளங்கள், மங்கள இசை
முழங்க, வேத மந்திரங்கள் ஒலிக்க திருத்தேரில் எழுந்தருளினார். தொடர்ந்து தேரில் சிறப்பு பூஜைகள் நடத்தப்பட்டு 9 மணிக்கு தேர் புறப்பாடு நடந்தது.

பல்லாயிரக்கணக்கான பக்தர்கள் கலந்து கொண்டு ‘கோவிந்தா... கோவிந்தா’ கோஷம் முழங்க தேரை வடம் பிடித்தனர். பிரம்மோத்ஸவ விழாவில் ஏப்.5ம் தேதி
கொடி இறக்கம் நடைபெறுகிறது.