தர்மபுரி கலவரத்தை படமாக்கவில்லை: டைரக்டர் ராதாமோகன் மறுப்பு

பிரகாஷ்ராஜ் தயாரிக்கும் படம் ‘கௌரவம்’. ‘மொழி’ படம் மூலம் பிரபலமான ராதாமோகன் இயக்குகிறார். சிரிஷ் நாயகனாகவும், யமிகுப்தா நாயகியாகவும் நடிக்கின்றனர்.

தர்மபுரியில் சமீபத்தில் நடந்த கலப்பு திருமண மோதலை மையமாக வைத்து இப்படம் எடுக்கப்படுவதாக எதிர்ப்பு கிளம்பியுள்ளது. குறிப்பிட்ட சமுதாயத்தினரை இழிவுபடுத்தும் காட்சிகள் இப்படத்தில் இடம் பெற்றுள்ளதாகவும் குற்றம் சாட்டப்பட்டு உள்ளது.

இதுகுறித்து கொங்கு வேளாள கவுண்டர்கள் பேரவை மாநில தலைவர் பொங்கலூர் ரா.மணி கண்டன் வெளியிட்டுள்ள அறிக்கையில், ‘கௌரவம்’ படத்தில் 60-க்கும் மேற்பட்ட சமுதாயத்தைச் சேர்ந்தவர்கள் கலப்பு திருமணத்துக்கு எதிராக கௌரவ கொலைகள் போன்ற செயல்களில் ஈடுபடுவது போன்றும் சாதி, மத நம்பிக்கைகளை இழிவுபடுத்தியும் வன்முறைகளை தூண்டிவிடும் வகையிலும் காட்சிகள் உள்ளதாக குற்றம்சாட்டி உள்ளார். சாதி, மத ஒற்றுமையை சீர்குலைக்கும் இப்படத்தை தடை செய்யவேண்டும் என்றும் வற்புறுத்தி உள்ளார்.

இதுகுறித்து டைரக்டர் ராதாமோகனிடம் கேட்டபோது அவர் கூறியதாவது:-

‘கௌரவம்’ படத்தை தர்மபுரி கலவரத்தை அடிப்படையாக வைத்து எடுக்கவில்லை. இந்த படத்தை ரிலீசுக்கு முன்பே எதிர்ப்பாளர்களிடம் திரையிட்டு காட்ட தயார். படத்தை பார்த்தால் உண்மையை புரிந்து கொள்வார்கள்.

இவ்வாறு அவர் கூறினார்.