ரிச்சர்ட்ஸ் ஆலோசனை பலன் அளித்தது -ஷேவாக்

ஐ.பி.எல். போட்டியில் டெல்லி டேர்டெவில்ஸ் அணி முதல் வெற்றியை பெற்றது. அந்த அணி 9 விக்கெட் வித்தியாசத்தில் மும்பை இந்தியன்சை வீழ்த்தியது. டெல்லி அணி முதல் வெற்றியை பெற ஷேவாக்கின் அதிரடி ஆட்டம் முக்கிய பங்கு வகித்தது. அவர் 57 பந்தில் 13 பவுண்டரி, 2 சிக்சருடன் 95 ரன்கள் எடுத்தார்.

டெல்லி அணிக்கு வெஸ்ட் இண்டீஸ் முன்னாள் அதிரடி பேட்ஸ்மேன் விவியன் ரிச்சர்ட்ஸ் ஆலோசகராக உள்ளார். அவரது ஆலோசனையும் டெல்லி அணியின் வெற்றிக்கு காரணமாக அமைந்தது. ரிச்சர்ட்சின் ஆலோசனை தனக்கு பலனை அளித்தாக ஷேவாக் கூறியுள்ளார். இது தொடர்பாக அவர் கூறியதாவது:-

தொடர்ந்து தோல்வியை சந்தித்து வந்த எங்கள் அணி வீரர்களுக்கு விவியன் ரிச்சர்ட்ஸ் நம்பிக்கை அளிக்கும் விதமாக ஆலோசனை வழங்கினார். அவரது ஆலோசனை உதவியாக இருந்தது. இதற்கு பலனும் கிடைத்தது. இதற்காக அவருக்கு நன்றியை தெரி வித்துக்கொள்கிறேன். என்னிடம் அவர் நீங்கள் நல்ல நிலையில் இருப்பதாக தெரிவித்தார். அவர் என்னிடம் பொய் சொல்வது நன்றாக தெரிந்தது.

எனது பேட்டிங் நிலை குறித்து நம்பிக்கை அளிக்கும் வகையிலேயே பேசினார். பேட்ஸ்மேன் என்றால் எந்த நிலையிலும் பயப்படக்கூடாது என்ற அவரது ஆலோசனை நம்பிக்கையை ஏற்படுத்தியது.

இவ்வாறு ஷேவாக் கூறியுள்ளார்.