சல்மானுடன் ஜோடி சேர மறுத்த அசின்!

லண்டன் ட்ரீம்ஸ் படத்தில் ‌சல்மானுடன் ஜோடியாக நடித்த அசின், புதிய படமொன்றில் அவருடன் ஜோடி போட மறுத்து விட்டார். பாலிவுட்டின் முன்னணி நடிகராக திகழும் சல்மான்கானுடன் நடிக்க, பிரபல நடிகைகள் போட்டி போட்டுக் கொண்டிருக்கும் சூழலில், அசின் நடிக்க மறுத்திருப்பது பாலிவுட்டில் பரபரப்பை ஏற்படுத்தியுள்ளது.

மலையாளத்தில் வெளியாகி வெற்றி பெற்ற `பாடிகார்ட் என்ற படம், தமிழில் விஜய்- அசின் நடிப்பில் காவலனாக உருவாகியிருக்கிறது. இந்த கதையை இந்தியில் ரீமேக் செய்ய திட்டமிட்டிருக்கும் சல்மான்கான், படத்தின் தனக்கு ஜோடியாக அசின் நடிக்க வேண்டும் என விரும்பியிருக்கிறார். இதையடுத்து படத்தை தயாரிக்கும் சல்மானின் தங்கை அல்விரா தரப்பினர் அசினிடம் பேசியிருக்கிறார்கள்.

ஆனால் அசின், சல்மானுடன் ஜோடி போட மறுத்து விட்டாராம். ஏற்கனவே சல்மானுடன் லண்டன் டிரீம்ஸ் படத்தில் நடித்த அசின், தற்போது ரெடி என்ற படத்திலும் ஜோடியாக நடித்து வருகிறார். இதனால் இருவரையும் இணைத்து பல கிசுகிசுக்கள் பரவி உள்ளன. அடுத்த படத்திலும் ஜோடியாக நடிப்பதை அசின் மறுத்துவிட்டதாக கூறப்படுகிறது.