ஐ.பி.எல். கிரிக்கெட்டால் தள்ளிப்போகும் பிரபலங்களின் படங்கள்!

ஐபிஎல் கிரிக்கெட் போட்டி நடைபெற இருப்பதால் மிகவும் எதிர்பார்ப்பை
ஏற்படுத்தியிருக்கும் பிரபல நடிகர்களின் படங்கள் ரிலீஸ் தள்ளிப்போகிறது.
ஐ.பி.எல். கிரிக்கெட் போட்டி வரும் ஏப்ரல் 4ம் தேதி சென்னையில் தொடங்கி மே
27ம் தேதி வரை, இந்தியா முழுவதும் பல்வேறு மாநிலங்களில் நடைபெறுகிறது. ஒரு
மாத காலம் நடைபெறும் இந்த கிரிக்கெட் திருவிழாவை ரசிகர்கள் பெரிய அளவில்
கொண்டாடி வருகின்றனர். டிக்கெட் விலை விண்ணை முட்டும் அளவில் இருந்தாலும்
அதை ஆர்வமுடன் பெற்று விளையாட்டை ரசிக்க தயாராகி வருகிறார்கள்.
கற்பனைக்கும் எட்டாத ஐபிஎல் வளர்ச்சியை கண்டு திரையுலகினர் நிஜமாகவே
பயந்துபோய் உள்ளனர். இதனால் சூட்டிங்கை முடித்து விட்டு ஏப்ரல், மே
மாதங்களில் வெளியிட தயாராக இருந்த படங்களை தற்போது ஜூன், ஜுலை மாதங்களுக்கு
தள்ளி வைத்திருக்கின்றனர். இந்த பட்டியலில் அஜீத்தின் பில்லா, கமலின்
விஸ்வரூபம், கார்த்தியின் சகுனி உள்ளிட்ட படங்களும் இடம்பிடித்துள்ளன
என்பது கூடுதல் தகவல்.