சாய்பாபாவாக நடிப்பது என் அதிர்ஷ்டம்: நாகார்ஜுனா

சாய்பாபா வாழ்க்கையை மையமாக வைத்து ‘ஷீரடி சாய்’ என்ற பெயரில் தெலுங்கு படம் தயாராகிறது. இதில் சாய்பாபா வேடத்தில் நாகார்ஜுனா நடிக்கிறார். இதன் படப்பிடிப்பு முடிந்து ரிலீசுக்கு தயாராகிறது.

சாய்பாபாவுக்கு தமிழகத்திலும் நிறைய பக்தர்கள் உள்ளனர். எனவே இப்படத்தை தமிழ்நாட்டிலும் தமிழில் டப்பிங் செய்து வெளியிட ஏற்பாடுகள் நடக்கின்றன.

இப்படத்தில் நடித்தது குறித்து நாகார்ஜுனா கூறியதாவது:-

நான் ஏற்கனவே பக்தி படங்களில் நடித்துள்ளேன். ‘அன்னமய்யா’ படத்தில் ஏழுமலையான் பக்தராக வந்தேன். ‘ஸ்ரீராமதாஸ்’ படத்தில் ஸ்ரீராமரின் பக்தராக நடித்தேன். இவ்விரு படங்களும் ரசிகர்கள் மத்தியில் அமோக வரவேற்பை பெற்றன.

தற்போது ‘ஷீரடி சாய்’ படத்தில் பகவான் சாய்பாபாவாக நடிக்கிறேன். ‘ஷீரடி சாய்பாபா’ படத்தையும் மக்கள் ஆதரிப்பார்கள். ‘ஷீரடி சாய்பாபா’ படத்தில் வரும் ‘அமரராமர்’ என்ற பாடலை காலையில் எழுந்ததும் கேட்டால் போதும் அன்று முழுவதும் உற்சாகமாக இருக்கலாம். இந்த படத்தில் நடித்த பிறகு ஷீரடி சாய்பாபாவின் வாழ்க்கை குறித்த பல விஷயங்களை நான் தெரிந்து கொண்டேன்.

இவ்வாறு நாகார்ஜுனா கூறினார்.