திருப்பாவை 28

கறவைகள் பின்சென்று கானம்சேர்ந் துண்போம்
அறிவொன்று மில்லாத ஆய்க்குலத்து உன்றன்னைப்
பிறவி பெறுந்தனைப் புண்ணியம் யாமுடையோம்
குறைவொன்று மில்லாத கோவிந்தா! உன்றன்னோடு
உறவேல் நமக்கிங் கொழிக்க ஒழியாது
அறியாத பிள்ளைகளோம் அன்பினா லுன்றன்னை
சிறுபே ரழைத்தனவும் சீறி அருளாதே!
இறைவா! நீதாராய்! பறையேலோ ரெம்பாவாய்!

பொருள்....அருள் மிகுந்த இறைவனே இடையர் குலத்தில் பிறந்த நாங்கள் பசுக்களை மேய்த்து அவற்றின் பின் செல்வோம். காட்டில் மேய்ந்த பின்னர் எங்களுக்குள் எந்த மாறுபாடும் இல்லாமல் எல்லோரும் சேர்ந்து உண்போம். கொஞ்சம் கூட கள்ளமில்லாத இப்படிப்பட்ட ஆயர்குலத்தில் நீ வந்து பிறந்தாய்.

அது நாங்கள் செய்த பெரும் புண்ணியம். குறை ஏதும் இல்லாத இறைவனே கோவிந்தா உனக்கும் எங்களுக்கும் உள்ள இந்த உறவை யாராலும் பிரிக்க முடியாது. நாங்கள் ஏதும் அறியாதவர்கள். உன் மீது வைத்துள்ள அன்பினால் உன் பெருமையை மறந்து பெயர் சொல்லி சாதாரணமாய் அழைத்து விட்டோம். எங்கள் மீது கோபம் கொள்ளாதே. கண்ணா உனது அருளை எங்களுக்கு தருவாயாக.