லட்சுமி மஞ்சுவுக்காக நடித்தேன்! டாப்சி

மறந்தேன் மன்னித்தேன் படத்தில் லட்சுமி மஞ்சுவுக்காக நடித்தேன் என நடிகை டாப்சி கூறியுள்ளார். ஆடுகளம் படம்மூலம் தமிழ்சினிமாவில் வெள்ளாவிப் பொண்ணாக தனுஷ்க்கு ஜோடியாக அறிமுகமானவர் நடிகை டாப்சி. அதன்பிறகு வந்தான் வென்றான் படத்தில் நடித்தவர் பிறகு தெலுங்கு படங்களில் பிஸியாக இருந்ததால் அங்கு சென்றுவிட்டார். தற்போது விஷ்ணுவர்தன் இயக்கத்தில் அஜீத் உடன் நடித்து வரும் டாப்சி இப்போது இந்தியிலும் களம் இறங்கியுள்ளார்.

இந்நிலையில் ஆதி, லட்சுமி மஞ்சு ஆகியோருடன் டாப்சி நடித்த தெலுங்கு படம் கொண்டேலு கோதாவரி என்ற பெயரில் ரிலீஸாகியுள்ளது. தமிழில் மறந்தேன் மன்னித்தேன் என்ற பெயரில் நேற்று ரிலீஸ் ஆகியுள்ளது. தமிழ், தெலுங்கு ஆகிய இரண்டு மொழியிலும் இளையராஜா இசையமைத்துள்ளார். தெலுங்கில் 1986-ல் ஆந்திராவில் நடந்த உண்மை சம்பவத்தை மையமாக வைத்து இந்த படத்தை எடுத்துள்ளனர். அந்த வருடத்தில் நடைபெற்ற வெள்ள பாதிப்பில் பலர் இறந்துள்ளனர். இதனை மையமாக வைத்தே கதை பின்னப்பட்டுள்ளது.

இப்படத்தில் நடிகை டாப்சிக்கு ரொம்ப சிறிய ரோல் தான். தமிழ், தெலுங்கு, இந்தி என மூன்று மொழிகளில் வலம் வரும் நீங்கள் எப்படி இந்த சின்ன ரோலில் நடிக்க சம்மதம் சொன்னீர்கள் என்று கேட்டபோது, இப்படத்தின் கதை ஒரு உண்மை சம்பவம். அதுமட்டுமின்றி லட்சுமி மஞ்சு என்னுடைய நெருங்கிய தோழி, அவருக்காக இதில் நடித்தேன் என்றார். மேலும் முன்பை காட்டிலும் ஸ்லிம் ஆகிவிட்டார்களே என கேட்டபோது, ஜிம்கே நான் போகவில்லை, டயட் கூட மெயிண்டன் பண்ணவில்லை இருந்தும், ஷூட்டிங் ஷூட்டிங் என்று ஓடி ஓடி உழைத்ததாலேயே என் உடம்பு தானாகவே குறைந்துவிட்டது என்று கூறியுள்ளார்.