வேட்டை ஹிந்தி ரீமேக்கில் ஷாருக்கான்?

தமிழில் இயக்குநர் லிங்குசாமி இயக்கி, மாதவன், ஆர்யா, சமீரா ரெட்டி, அமலாப் பால் ஆகியோர் நடித்த வேட்டைத் திரைப்படம் ஹிந்தியில் ரீமேக் ஆகிறது. இதில் மாதவன் நடித்த கதாப்பாத்திரத்தில் ஷாருக்கான் நடிக்க இருப்பதாக தகவல்கள் வெளியாகியுள்ளன.

இது குறித்து லிங்குசாமியிடம் கேட்டால், "வேட்டை திரைப்படம் ஹிந்தியில் ரீமேக் ஆகிறது. அதனை நான்தான் இயக்குகிறேன். இதுவரை மட்டுமே முடிவு செய்யப்பட்டுள்ளது. மற்ற விஷயங்கள் குறித்த பேசி முடிவெடுக்க இன்னும் ஓரிரு நாட்களில் நான் மும்பை போக உள்ளேன். அதன் பிறகுதான் மற்ற விஷயங்கள் தெரிய வரும்" என்று முடித்துவிட்டார்.

வேறு எதுவும் தகவல் இல்லையா.. வந்ததற்கு இந்த விஷயங்கள் போதாதே என்று நாம் மீண்டும் கேட்டதற்கு, "தமிழில் விஷாலுக்கு இரண்டு கதைகளை தயாராக வைத்துள்ளேன். எது முதலில் துவங்கும் என்று தெரியவில்லை. எங்கள் தயாரிப்பில் உருவாகியுள்ள திருப்பதி பிரதர்ஸ் மற்றும் வழக்கு எண் 18/9 படங்கள் விரைவில் வெளியாக உள்ளன" என்று தகவல்களை அடுக்கினார் லிங்குசாமி.

படங்கள் வெளிவர ஏன் இவ்வளவு காலதாமதம் என்று கேட்டதற்கு, "வேட்டை வெளியாகி ஒரு மாதம்தான் ஆகிறது. அடுத்து வழக்கு எண் படத்தை வெளியிட கடுமையாக உழைத்து வருகிறோம்" என்றார்.