ஏப்ரல் 5ல் டைட்டானிக் 3டி

உலக அளவில் வசூலில் சாதனை படைத்து பல விருதுகளை குவித்த டைட்டானிக் படம் தற்போது 3 டி தொழில்நுட்பத்துடன் மறு வெளியீடு செய்யப்படுகிறது. இப்படத்திற்கு இந்தியாவில் மீண்டும் சென்சார் செய்யப்பட்டு, யுஏ சான்றிதழுடன் டைட்டானிக் 3டி படம் ஏப்ரல் மாதம் 5ம் தேதி திரைக்கு வருகிறது.

டைட்டானிக் கப்பல் கடலில் மூழ்கி நூறு ஆண்டுகள் நிறைவடையும் நிலையில் இப்படம் மறுவெளியீடு செய்யப்படுகிறது. கதாநாயகி கேட் வின்ஸ்லெட்டை படம் வரையும் காட்சிகள் சென்சாரால் கத்திரி போட்டு நீக்கப்பட்டுவிட்டது.

இது குறித்து ஜான் லான்டவ் கூறுகையில், ஒவ்வொரு நாடும் ஒவ்வொரு கொள்கையைக் கடைபிடிக்கின்றன. அவற்றை நாங்கள் மதிக்கிறோம். ஒரு சில காட்சிகளை நீக்குவதால் இப்படத்தின் தரம் எந்த வகையிலும் குறைந்துவிடப் போவதில்லை என்றார்.