இயக்குநர் வெங்கடேஷின் புதிய படம்

இயக்குநர் வெங்கடேஷ் என்றால் தமிழ் ரசிகர்கள் அவ்வளவு எளிதாக மறக்க மாட்டார்கள். பகவதி, குத்து, ஏய், தம், வா டா என்று பல ஆக்சன் படங்களை அளித்து அவருக்கு என்று ஒரு பாணியை அமைத்துக் கொண்டவர் இயக்குநர் வெங்கடேஷ்.

தற்போது அவரது புதிய படம் பற்றி அறிவிப்பு வெளியாகியுள்ளது. ஆனால் அது வழக்கம் போல குத்து, வெட்டு என்று இல்லாமல், காதலுக்கும், நட்புக்கும் இடையே சிக்கிக் கொள்ளும் இளைஞனைப் பற்றியக் கதையாம்.

ஏன் இப்படி உங்கள் பாணியில் இருந்து விலகி இந்த புதிய பாதை என்று கேட்டதற்கு, இதுவும் இளைஞர்களுக்கான படம்தான் ஆனால், காதலையும், இளமையையும் மிக மென்மையாக எடுத்துச் செல்லும் படமாக இருக்கும் என்கிறார் சிரித்தபடி.

இப்படத்தில் காமெடி கதாபாத்திரத்தில் வெங்கடேஷே நடிக்க உள்ளார். மலையாள நடிகர் அலெக்சின் மகன் தேஜாஸ் கதாநாயகனாக நடிக்க, உத்ரா என்ற புதிய வரவு கதாநாயகியாக நடிக்கிறார்.

ஆமாம் எல்லாம் சரி.. படத்திற்கு என்ன பெயர் என்று நீங்கள் கேட்பது புரிகிறது.. அதை நாமும் கேட்டோம்.. என்னவோ சொன்னாரே.. என்ன... ஓ.. ஞாபகம் வந்து விட்டது.. படத்திற்குப் பெயர்.. எனக்கு வாய்த்த நண்பர்கள் இப்படி.. உண்மையாக நம்புங்கள். இதுதான் படத்தின் பெயர். இப்படத்திற்கு வசனங்கள் எழுதுவது யார் தெரியுமா? பிரபல எழுத்தாளர் பட்டுக்கோட்டை பிரபாகர்.