நடிகை சண்முகசுந்தரி காலமானார்

சென்னை, மே 1: பழம்பெரும் நடிகை சண்முகசுந்தரி (75) உடல் நலக்குறைவு காரணமாக சென்னையில் செவ்வாய்க்கிழமை காலமானார்.

சென்னை சாலிகிராமத்தில் குடும்பத்தினருடன் வசித்து வந்த சண்முகசுந்தரி சில மாதங்களாக சர்க்கரை நோய்க்காக சிகிச்சை பெற்று வந்தார். இந் நிலையில் அவரது உடல்நிலை தீவிரமாக பாதிக்கப்பட்டு செவ்வாய்க்கிழமை அதிகாலை உயிரிழந்தார்.

சண்முகசுந்தரி ராஜபாளையத்திலுள்ள கூடலூரைச் சேர்ந்தவர். சிறு வயதிலேயே பாய்ஸ் நாடகக் கம்பெனியில் சேர்ந்து நாடகங்களில் நடித்து வந்தார். பிரபல இயக்குநர் ஏ.பி.நாகராஜன் மூலம் திரையுலகுக்கு அறிமுகமானார்.

எம்.ஜி.ஆர்., சிவாஜி, ஜெமினி, ஜெய்சங்கர், கமல், ரஜினி, பிரபு, கவுண்டமணி, வடிவேலு, மனோரமா உள்ளிட்ட பலருடன் சுமார் 750 படங்களில் நடித்துள்ளார். ஏராளமான படங்களுக்கு டப்பிங் குரலும் கொடுத்துள்ளார்.

இவருடைய கணவரும் நாடக நடிகருமான கபாலி 2005-ம் ஆண்டு காலமானார்.

அவருக்கு டி.கே. கலா, நீலா, மாலா, மீனா, செல்வி என ஐந்து மகள்கள் உள்ளனர். இவர்களில் டி.கே. கலா பிரபல பின்னணிப் பாடகி ஆவார்.

மறைந்த சண்முகசுந்தரியின் இறுதிச் சடங்கு வளசரவாக்கம் மின் மயானத்தில் புதன்கிழமை காலை நடைபெறுகிறது.