இனி இந்தியில் நடிக்க மாட்டேன்: த்ரிஷா

தமிழ், தெலுங்கு படங்களில் நடித்து வந்த த்ரிஷா, இயக்குனர் பிரியதர்ஷன் இயக்கிய கட்டா மிட்டா என்ற படம் மூலம் இந்தி படவுலகில் அறிமுகமானார். அந்த படம் அவருக்கு கைகொடுக்கவில்லை. இதையடுத்து கோலிவுட் படங்களுக்கே திரும்பினார்.

இது பற்றி த்ரிஷா அளித்த பேட்டியில் கூறியதாவது: அஜீத்துடன் மங்காத்தா படத்தில் நல்ல வேடம். ஹிட் படமாக அமைந்தது. நான் மீண்டும் மாடலிங் துறைக்கு போகப்போவதாக கூறுகிறார்கள். அதில் எனக்கு ஆர்வமில்லை.

இந்தி படங்களில் இப்போதைக்கு நடிக்கும் எண்ணம் எதுவுமில்லை. இந்தியில் தயாராகும் விண்ணைத் தாண்டி வருவாயா படத்தில் தமிழில் நான் நடித்த கதாபாத்திரத்தில் எமி ஜாக்சன் நடிக்கிறார். இந்த வேடத்தில் நான் நடிக்கவில்லையே என்று வருத்தம் எதுவும் இல்லை. இந்தியில் எந்த படமும் ஏற்கும் எண்ணம் இல்லை.

பாலிவுட் முற்றிலும் வித்தியாசமான இடம். ரசிகர்களின் ரசனையும் வித்தியாசமானது. அவர்களின் எதிர்பார்ப்பை எமி நிறைவு செய்வார் என்று நம்புகிறேன்.