கிளாமராக நடிக்க மாட்டேன்

சென்னை : கிளாமராக நடிப்பது எனக்கு சரிவராது என்று விசாகா சிங் கூறினார். ‘பிடிச்சிருக்கு’, ‘கண்ணா லட்டு தின்ன ஆசையா’ படங்களில் ஹீரோயினாக நடித்தவர் விசாகா சிங். அவர் கூறியதாவது: ‘பிடிச்சிருக்கு’ படத்துக்குப் பிறகு இந்திக்கு சென்றுவிட்டேன். தமிழில் நீண்ட இடைவெளிக்குப் பிறகு ‘கண்ணா லட்டு தின்ன ஆசையா’ பட வாய்ப்பு வந்தது. ஆடிஷனில் தேர்வான பிறகு நடித்தேன். இந்தப் படம் தமிழக ரசிகர்களிடம் என்னை அதிகளவு கொண்டு சேர்த்திருக்கிறது.

வெளியிடங்களுக்கு செல்லும்போது என்னை அடையாளம் கண்டு பேசுகிறார்கள். பாராட்டுகிறார்கள். இந்தப் படத்தை தொடர்ந்து இன்னும் சில வாய்ப்புகள் வந்திருக்கிறது. கிளாமராக நடிப்பீர்களா என்கிறார்கள். ‘கண்ணா லட்டு தின்ன ஆசையா’ படத்தில் ஒரு பாடலுக்கு கிளாமராக நடித்திருந்தேன். அது முகம் சுழிப்பது போல் இருக்காது. அது மாதிரியாக நடிப்பேன். அதிக கிளாமராக என்னால் நடிக்க முடியாது. இவ்வாறு விசாகா சிங் கூறினார்.