இளையராஜாவுடன் மீண்டும் இணைகிறார் மிஷ்கின்

ஒரு இடைவெளிக்குப் பிறகு மீண்டும் இளையராஜாவுடன் இணைகிறார் மிஷ்கின்.

மிஷ்கின் அடுத்ததாக இயக்கப் போகும் திரைப்படம் 'ஓநாயும் ஆட்டுக்குட்டியும்'. முகமூடி தோல்வியைத் தொடர்ந்து மிஷ்கினை வைத்து தயாரிக்க தயாரிப்பாளர்கள் யாரும் முன்வரவில்லை. இதனால் சொந்தமாக படத் தயாரிப்பு நிறுவனத்தை தொடங்கி அதன்மூலம் திரைப்படத்தை தயாரிக்கும் முடிவுக்கு வந்தார். அதன்படி கடந்த ஞாயிறு அன்று "லோன் ஓல்ப்" என்கிற தயாரிப்பு நிறுவனத்தை தொடங்கினார். இதனையடுத்து அவர் நேற்று தன்னுடைய அடுத்தப் படம் குறித்த அறிவிப்பினை வெளியிட்டார். இந்தப் புதிய படத்திற்கு 'ஓநாயும் ஆட்டுக்குட்டியும்' என பெயரிட்டிருக்கிறார். இப்படத்தை "லோன் ஓல்ப்" சார்பில் சொந்தமாக தயாரிக்கிறார்.

ஞாயிறு அன்று பட நிறுவனத்தின் பெயர், நேற்று படத்தின் பெயர், இன்று புதிய படத்திற்கு இசையமைக்கப் போவது இளையராஜா என தினமும் ஒவ்வொரு தகவலாக வெளியிட்டு வருகிறார் மிஷ்கின். எனவே, நாளை படத்தில் நடிக்கும் நடிகர்களைப் பற்றிய அறிவிப்பு வெளியாகலாம் என எதிர்பார்க்கப்படுகிறது. நந்தலாலாவில் பின்னணி இசையில் பிரமாதப்படுத்தியிருந்தார் இளையராஜா. இந்நிலையில் ஒரு இடைவெளிக்குப் பிறகு மீண்டும் மிஷ்கின்-இளையராஜா கூட்டணி இணைவது குறிப்பிடத்தக்கது .