ஒரே பாடலுக்கு பத்தரை கெட்டப் போட்ட பவர் ஸ்டார்

தன்னை கிண்டல் அடிப்பதையே ஒரு விளம்பரமாக எடுத்துக் கொண்டு அதை வைத்தே சினிமாவில் வெற்றியும் பெற்றுவிட்டார் பவர் ஸ்டார்.

கண்ணா லட்டு தின்ன ஆசையா படத்தின் மூலம் பவர் ஸ்டாரின் புகழ் உலகமெங்கும் பரவிவிட்டது. அந்த வரிசையில் தற்போது பவர் ஸ்டார் ஸ்ரீனிவாசன் நடித்து வரும் ஒன்பதுல குரு படத்தில், அவருக்கு என தனியாக ஒரு பாடல் காட்சியும் அமைக்கப்பட்டுள்ளது.

அந்த பாடல் காட்சிக்காக தான் பத்தரை கெட்டப்புகள் போட்டுள்ளதாகக் கூறுகிறார் பவர் ஸ்டார். அது என்ன பத்தரை என்று கேட்டால், ஒரு சிறிய குழந்தை போல எனது முகம் மட்டும் மார்பிங் செய்யப்பட்டு ஒரு காட்சி இடம்பெற்றுள்ளது. குழந்தை என்பதால் அது அரை என்று கணக்கிட்டு பத்தரை கெட்டப்புகள் என்றேன் என்கிறார் அந்த மழலைச் சிரிப்புடன்.

இவ்வாறு பத்தரை கெட்டப்புகள் போட்டு எடுத்த பாடலுக்கான வரிகள், நினைத்ததை முடிப்பவன் என்று ஆரம்பிக்கின்றன. இந்த பாடல் படமாக்கப்பட்ட விதத்தைப் பார்த்து உடன் நடிக்கும் நடிகர்கள் பாராட்டியதாக கூறுகிறார் பவர் ஸ்டார்.

இப்படத்தில், அச்சு இசையமைப்பில் உருவான ஆடியோ வெளியீடு மார்ச் மாதம் 9ம் தேதி மலேசியாவில் நடைபெற உள்ளது. இதற்காக மலேசியா செல்லும் படக்குழுவினர், அங்கு ஒரு மாத காலம் இருந்து படப்பிடிப்பையும் நடத்தி முடித்துவிட்டு நாடு திரும்ப திட்டமிட்டுள்ளனர்.