மீண்டும் இணைகிறது துப்பாக்கி கூட்டணி

விஜய்-முருகதாஸ் கூட்டணி மீண்டும் ஒரு புதிய படத்தில் இணைவது உறுதி செய்யப்பட்டுள்ளது.

கடந்த ஆண்டு விஜய்-முருகதாஸ் கூட்டணியில் வெளியான துப்பாக்கி திரைப்படம் மிகப்பெரிய வெற்றிபெற்றது. இப்படம் சுமார் ரூ.100 கோடிக்கு மேல் குவித்து வசூல் சாதனையும் படைத்தது.

இதனையடுத்து ஏ.ஆர். முருகதாஸ்-அஜீத் கூட்டணி புதிய படத்தில் இணைவதாக கூறப்பட்டது. ஆனால் அது உண்மையல்ல என தெரியவந்துள்ளது. இப்போது துப்பாக்கி இந்தி ரீமேக்கை இயக்கி வரும் முருகதாஸ் அதை முடித்த கையோடு மீண்டும் விஜய்யுடன் இணைகிறார். இந்தப் படத்தை துப்பாக்கி திரைப்படத்தை தயாரித்த தாணு தயாரிக்கலாம் என கூறப்படுகிறது.

இதுகுறித்து முருகதாஸ் கூறியதாவது: சில தினங்களுக்கு முன்பு விஜய்யை சந்தித்து பேசினேன். அப்போது இருவரும் மீண்டும் ஒரு படத்தில் இணைவது என்று முடிவு செய்யப்பட்டது. ஆனால் அது ‘துப்பாக்கி’யின் இரண்டாம் பாகமாக இல்லாமல் வித்தியாசமான கதையாக இருக்கும் என்றார். ஏ.ஆர். முருகதாஸ் விஜய், காஜல் அகர்வாலை வைத்து எடுத்த துப்பாக்கி படத்தை இந்தியில் 'பிஸ்டல்' என்ற பெயரில் ரீமேக் செய்து வருகிறார். இந்தியில் விஜய் கதாபாத்திரத்தில் அக்ஷய் குமார் நடிக்கிறார். இதன்பிறகே தன்னுடைய அடுத்தப்பட வேலையில் இறங்குகிறார் முருகதாஸ்.