பிப்ரவரியில் மார்ச்!

டிசம்பர் 2012 இறுதியிலும், பொங்கல் நேரத்திலும் பல படங்கள் வெளியாகும் என்று தீர்மானிக்கப்பட்டு, அதில் பல படங்கள் வெளியாகாமல் இருக்கின்றன.

பொங்கலுக்கு 'அலெக்ஸ் பாண்டியன்', 'சமர்', 'கண்ணா லட்டு தின்ன ஆசையா', 'புத்தகம்', 'விஜய நகரம்' ஆகிய படங்கள் வெளியாகின. ஆனால் 'கண்ணா லட்டு தின்ன ஆசையா', சமர் ஆகிய 2 படங்கள் மட்டுமே மக்களிடையே வரவேற்பை பெற்றுள்ளன.

பிரம்மாண்ட விளம்பரங்களால் மிகவும் எதிர்பார்க்கப்பட்ட 'அலெக்ஸ் பாண்டியன்' படம் தோல்வியை சந்தித்தது. 'புத்தகம்', 'விஜயநகரம்' ஆகிய படங்கள் போதிய வரவேற்பை பெறவில்லை.

பலமுறை தள்ளிவைக்கப்பட 'விஸ்வரூபம்' திரைப்படம் ஜனவரி 25ம் தேதி கண்டிப்பாக வெளிவரும் என்று தெரிவித்து இருக்கிறார்கள். பிப்ரவரி 1ம் தேதி மற்றும் காதலர் தினத்தினை மனதில் வைத்து பல படங்கள் தங்களது வெளியீட்டு தேதியை அறிவிக்க இருக்கிறாகள்.

மணிரத்னம் இயக்கத்தில் உருவாகியுள்ள 'கடல்' படத்தினைப் பார்த்த சென்சார் அதிகாரிகள் படத்திற்கு U சான்றிதழ் அளித்து இருக்கிறாகள். படம் பிப்ரவரி 1ம் தேதி வெளியாக இருக்கிறது.

டேவிட், ஆதிபகவன், கேடி பில்லா கில்லாடி ரங்கா, மூன்று பேர் மூன்று காதல், அன்னக்கொடியும் கொடிவீரனும், பரதேசி, மதகஜராஜா, எதிர் நீச்சல் ஆகிய படங்களை பிப்ரவரியில் வெளிக்கொண்டுவர முடிவு செய்து இருக்கிறார்கள். பிப்ரவரியில் பல படங்கள் March செய்ய உள்ளன!