நடிகர் ஆனார் ப்ரியதர்ஷன்

பிரபல மலையாள இயக்குனர் ப்ரியதர்ஷன். மலையாளம், தமிழ், இந்தி, தெலுங்கு மொழிகளில் 87 படங்களை இயக்கி உள்ளார். த்ரிஷா உள்பட பல முக்கிய நடிகர் நடிகைகளை அறிமுகப்படுத்தினார். 56 வயதாகும் ப்ரியதர்ஷன் முதன் முறையாக ஒரு திரைப்படத்தில் நடிக்கிறார். மலையாளத்தில் தேசிய விருது பெற்ற இயக்குனர் ப்ளஸ்சி இயக்கும் "களிமண்" என்ற படத்தில் இயக்குனராகவே நடிக்கிறார். ஸ்வேதா மேனன் தான் குழந்தை பெறுவதை அப்படியே படம்பிடித்துக் கொள்ள அனுமதித்தாரே அதே படம்தான். அந்தக் காட்சியை படமாக்கும் இயக்குனராக பிரியதர்ஷன் நடிக்கிறார். ப்ரியதர்ஷன் தற்போது "நாடோடிகள்" படத்தை "ரன்கரீஸ்" என்ற பெயரில் இந்தியில் ரீமேக் செய்து வருகிறார்.

இதுபற்றி ப்ரியதர்ஷன் கூறும்போது: "பலமுறை நடிக்க வந்த வாய்ப்புகளை மறுத்திருக்கிறேன். நடிக்க வைப்பது எளிது நடிப்பது கஷ்டம் என்பது எனக்குத் தெரியும். அதோடு சினிமாவில் நடிக்கும் அளவிற்கு நான் அழகான முகத்தை கொண்டவன் அல்ல. இருந்தாலும் இயக்குனர் ப்ளஸ்சி இயக்குனராகவே நடிக்க வேண்டும் என்ற கூறியதால் சிறப்பு தோற்றத்தில் நடித்திருக்கிறேன்" என்றார்.