விஸ்வரூபம் படம் பார்க்க சித்தூர் தியேட்டரில் குவிந்த வேலூர் கமல் ரசிகர்கள்

கமலஹாசன் நடித்த விஸ்வரூபம் படத்துக்கு தடை நீட்டிக்கப்பட்டுள்ளது. இதனால் தமிழக கமல் ரசிகர்கள் ஏமாற்றம் அடைந்துள்ளனர். வேலூரில் இருந்து சுமார் 40 கீ.மீ. தொலைவில் உள்ள ஆந்திர மாநிலம் சித்தூரில் விஸ்வரூபம் படம் தெலுங்கில் ரீலிசாகி உள்ளது.

இங்குள்ள தியேட்டரில் விஸ்வரூபம் படம் பார்க்க வேலூர் ரசிகர்கள் 200-க்கும் மேற்பட்டோர் தனி வாகனங்களில் சென்றனர். அவர்கள் அங்கு படத்தை பார்த்து மகிழ்ச்சி அடைந்தனர். இதேபோல் கிருஷ்ணகிரி தர்மபுரி, சேலம், காஞ்சீபுரம் வேலூர் மாவட்டத்தின் பல்வேறு பகுதிகளை சேர்ந்தவர்களும் தியேட்டரில் குவிந்தனர்.

ஏராளமான தமிழக ரசிகர்கள் சித்தூர் தியேட்டரில் குவிந்ததால் அங்கு பரபரப்பு ஏற்பட்டது. இதுகுறித்து வேலூர் மாவட்ட கமல் நற்பணி மன்ற பொறுப்பாளர் சத்தியநாதன் கூறியதாவது:-

வேலூரில் இருந்து சித்தூரில் உள்ள தியேட்டருக்கு சென்று விஸ்வரூபம் படம் தெலுங்கில் பார்த்தோம். தியேட்டரில் வேலூர், கிருஷ்ணகிரி, தர்மபுரி, சேலம் மாவட்ட கமல் ரசிகர்கள் குவிந்திருந்தனர். படத்தில் அசம்பாவிதம் ஏற்படுத்தும் விதத்தில் காட்சிகள் இல்லை. தமிழில் பார்க்க முடியாதது ஏமாற்றமாக உள்ளது.

இவ்வாறு அவர் கூறினார்.