கமலஹாசனுக்கு கர்நாடக துணை முதல்-மந்திரி அழைப்பு: எங்கள் மாநிலத்தில் குடியேறுங்கள்

விஸ்வரூபம் படத்துக்கு தனது சொத்துக்களை அடகு வைத்து ரூ.90 கோடி முதலீடு செய்து இருப்பதாகவும், அது வெளிவராவிட்டால் எனது வீடு உள்ளிட்ட சொத்துக்களை இழக்க நேரிடும் என்றும், அதனால் தமிழ்நாடடில் இருந்து வெளியேறி மதசார்பற்ற மாநிலத்தில் குடியேறுவேன் என்றும் கமலஹாசன் உருக்கமாக பேட்டி அளித்தார்.

குடியேற எந்த மாநிலமும் கிடைக்காவிட்டால் நாட்டை விட்டு வெளியேறி மத சார்பற்ற நாட்டில் குடியேறுவேன் என்றும் அவர் கூறினார். இந்த நிலையில் கமலஹாசனை கர்நாடக மாநிலத்தில் குடியேற வாருங்கள் என்று அம்மாநில துணை முதல்- மந்திரி ஆர்.அசோக் அழைப்பு விடுத்து உள்ளார்.

இதுகுறித்து அவர் நிருபர்களிடம் கூறியதாவது:-

விஸ்வரூபம் படத்துக்கு தடை விதித்து இருப்பது ஏற்புடையது அல்ல. மன வேதனையில்தான் அவர் நாட்டை விட்டு வெளியேறு வேன் என்று கூறியுள்ளார். அவர் எங்கும் செல்ல வேண்டாம். கர்நாடகாவில் குடியேற அவருக்கு அனைத்து ஏற்பாடுகளும் செய்ய தயாராக இருக்கிறோம். பெங்களூரில் தங்கினாலும் அதற்கான ஏற்பாடுகளை செய்வோம்.

இவ்வாறு அவர் கூறினார்.

இதேபோல் ஆந்திர மாநில பாரதீய ஜனதா தலைவர் கிஷன் ரெட்டியும் கமலஹாசனுக்கு ஆதரவு தெரிவித்து உள்ளார். விஸ்வரூபம் படம் எந்த மதத் தலைவர்களுக்கும் எதிராக இல்லை. நாட்டை அச்சுறுத்தி வரும் தீவிர வாதத்துக்கு எதிராகத்தான் படம் உள்ளது. உலகதரத்துக்கு அப்படத்தை கமலஹாசன் எடுத்துள்ளார். அவர் தென் இந்தியாவில் பிறந்து உள்ளார் என்பதை எண்ணி பெருமைப்படுகிறேன்.

ஒரு இந்தியர் இந்த சாதனையை படைத்துள்ளார் என்று ஒவ்வொரு இந்தியனும் பெருமைப்பட வேண்டும். எந்த காட்சியையும் வெட்டாமல் படத்தை முழுமையாக வெளியிட தமிழக அரசு முன்வர வேண்டும் என்றார்.