தீபாவளி ரேஸ் - ஒரு பார்வை

தீபாவளிக்கு எட்டும் பத்தும் படங்கள் வெளியான காலம் மலையேறிவிட்டது. இரண்டு பெ‌ரிய படங்கள் வெளியானால் அபூர்வம். அதற்கே தியேட்டர்கள் கிடைப்பது கஷ்டமாகி வருகிறது.

வருகிற தீபாவளிக்கு துப்பா‌க்‌கி, அலெக்ஸ் பாண்டியன், சமரன், போடா போடி, கும்கி, கள்ளத்துப்பாக்கி என்று அரை டஜன் படங்கள் வெளியாவதாகச் சொல்லப்பட்டது. துப்பாக்கி காரணமாக இந்த ரேஸிலிருந்து அலெக்ஸ் பாண்டியன் அப்போதே விலகிவிட்டது. கும்கி படத்தில் சில ‌ரீவொர்க் (‌‌ரீ ஷூ‌ட்?) இருப்பதால் தீபாவளிக்கு வெளியாகாது என்று பின் வாங்கிவிட்டது. போடா போடி தீபாவளிக்கு என்று அறிவித்தார்கள், அதன் பிறகு சத்தத்தையே காணோம்.

இப்போது புதிதாக தங்கர்பச்சான் தனது அம்மா சென்டிமெண்டான அம்மாவின் கைப்பேசியை தீபாவளிக்கு வெளியிடும் மும்முரத்தில் இருக்கிறார். நமக்கென்னவோ தங்கர் பாதியிலேயே ரேஸிலிருந்து வெளியேறுவார் என்றே தோன்றுகிறது.

துப்பாக்கியுடன் மோதி ‌ரிஸ்க் எடுக்க யாருக்கும் துணிச்சலில்லை. அதேநேரம் துப்பாக்கியுடன் மோதினால் மட்டுமே பப்ளிசிட்டி கிடைக்கும் என்ற நிலையில் கள்ளத்துப்பாக்கி உள்ளது. ஆக, கடைசி நேரத்தில் துப்பாக்கியும், கள்ளத்துப்பாக்கியும் மட்டுமே களத்தில் இருக்கும் என்று தோன்றுகிறது. கோடம்பாக்கத்தின் வானிலை அறிக்கையும் அதையே உறுதி செய்கிறது.