மிரட்டல் - டி‌‌ஜிபி அலுவலகத்தில் கமல் புகார்

டிடிஹெச் சில் விஸ்வரூபம் படத்தை வெளியிடுவதை தடுக்கும் விதத்தில் தன்னை சிலர் மிரட்டியதாக டி‌‌ஜிபி அலுவலகத்தில் கமல்ஹாசன் இன்று புகார் தந்தார்.

கமல்ஹாசன் தனது விஸ்வரூபம் படத்தை பத்தாம் தேதி இரவு டிடிஹெச் சிலும், பதினொன்றாம் தேதி திரையரங்குகளிலும் வெளியிடுகிறார். இதற்கு பெருவா‌ரியான திரையரங்கு உ‌ரிமையாளர்களும், விநியோகஸ்தர்களில் ஒரு பி‌ரிவினரும் கடும் எதிர்ப்பு தெ‌ரிவித்து வருகின்றனர். இதில் சம்பந்தமே இல்லாத கேபிள் ஆபரேட்டர்கள் சிலரும் திரைகட்டி இலவசமாக படத்தை வெளியிடுவோம், கேபிளை கட் பண்ணுவோம் என்றெல்லாம் கொக்க‌ரித்து வருகின்றனர்.

இந்நிலையில் இன்று சென்னை டி‌‌ஜிபி அலுவலகத்துக்கு பிஆர்ஓ நிகில் முருகன் மற்றும் சில திரையுலக பிரமுகர்களுடன் வந்த கமல்ஹாசன் புகார் மனு ஒன்றை அளித்தார். அதன் பிறகு செய்தியாளர்களிடம் பேசினார்.

விஸ்வரூபம் படம் திட்டமிட்டபடி பத்தாம் தேதி டிடிஹெச் சிலும், பதினொன்றாம் தேதி உலகம் முழுவதும் திரையரங்குகளில் மும்மொழிகளிலும் வெளியாகும். டிடிஹெச் சில் படம் ஒளிபரப்புவதை தடுக்கும் விதத்தில் திருட்டு டிவிடி யில் படத்தை வெளியிடுவோம், மின்சாரத்தை துண்டிப்போம் என்று சிலர் சவால் விட்டிருக்கிறார்கள். இவையெல்லாம் சட்டத்துக்குப் புறம்பான கூக்குரல்கள். அதனால் இங்கு புகார் தந்திருக்கிறேன் என்றார்.

மிரட்டல் விடுத்தவர்கள் யார் என்ற கேள்விக்குப் பதிலளித்தவர், அவர்களின் பெயர்களை புகார் மனுவில் குறிப்பிட்டிருக்கிறேன். அதில் சினிமாக்காரர்களின் பெயர்களும் இருக்கலாம் என தெ‌ரிவித்தார்.

டி‌‌ஜிபி அலுவலகத்தில் புகார் தந்த பிறகு தமிழக முதன்மை உள்துறை செயலாளரை சந்தித்து புகார் தர கமல் கிளம்பிச் சென்றார்.

இந்த சந்திப்பின் போது விஸ்வரூபம் படம் தமிழகத்தில் 200 க்கும் அதிகமான திரையரங்களில் வெளியாகும் என்று கமல் தெ‌ரிவித்தார். படம் திரையிடப்படும் திரையரங்குகளுக்கும் கமல் போலீஸ் பாதுகாப்பு கேட்டுள்ளதாக தெ‌ரிகிறது.