நான் எனது தாய்மாமனை காதலிக்கிறேன். அவரும் என்னை திருமணம் செய்து கொள்ள விரும்புகிறார். அவர் வீட்டில் வேறொரு பெண்ணை மணம்முடிக்க நினைக்கிறார்கள். என் மாமனும் தர்மசங்கடத்தில் குழம்பிப் போய் உள்ளார். நல்வழி காட்டுங்கள்.

உங்கள் உறுதியை கடிதத்தில் கண்டேன். ஆனால் உங்கள் தாய்மாமன், அவர்கள் வீட்டில் எப்படிப் பேசுகிறார் என்பதுதான் முக்கியம். இதைத் தாண்டி உங்களின் குடும்ப உறவுகளில் ஏதேனும் சிக்கல் உள்ளதா என்பது போன்ற விஷயங்களும் அடங்கியுள்ளன. இம்மாதிரி விஷயங்களில் பெற்றோர்தான் முடிவு செய்ய வேண்டும். மூன்றாம் நபர் ஆலோசனைகள் பாதையை மாற்றிவிடும்.

உங்கள் தாயாரிடமே இதைச் சொல்லலாமே. இரு குடும்பத்துக்கும் பொதுவான உறவினர்கள் யாரேனும் இருப்பார்கள் அல்லவா? அவர்களை முன்நின்று பேசச் சொல்லுங்கள். மனிதர்களுடைய முயற்சியைத் தாண்டி தெய்வங்கள்தான் திருமணங்களை நடத்தி வைக்கின்றன. அதனால் நான் சொல்லும் கோயிலுக்கு முடிந்தால் குடும்பத்தோடு சென்று வாருங்கள்.

தஞ்சாவூர்-திருவையாறுக்கு அருகிலுள்ள திருவேதிக்குடி எனும் தலத்தில் அருள்பாலிக்கும் வேதபுரீஸ்வரரையும் மங்கையர்க்கரசியையும் வெள்ளிக்கிழமையன்று தரிசித்து வாருங்கள். வியாழக்கிழமை அன்று உங்கள் ஊரிலுள்ள தட்சிணாமூர்த்தி சந்நதியில் அமர்ந்து கீழ்க்காணும் ஸ்லோகத்தை 21 முறை சொல்லுங்கள்:

ஆங்கீரஸ! ஸுராசார்ய!
தேவரூரோ! மமாமிலஷிதா
ப்ரியம் வரம் தேஹி!
தேஹி! கும்குருப்யோ நம: