நன்றாகப் படித்து நல்ல பணியில் இருக்கும் என் மகளின் கணவர் பிரிந்துச் சென்று விட்டார். அவளுக்கு ஒரு ஆண் குழந்தை உள்ளது. என் வீட்டில் வசிக்கும் அவள், மீண்டும் கணவரோடு சேர்ந்து வாழ என்ன பரிகாரம் செய்ய வேண்டும்?

ஒரு குழந்தை இருக்கும்போது இப்படி கணவன்&மனைவி பிரிந்திருப்பது என்பது எதிர்காலத்திற்கு நல்லதில்லைதான். என்னதான் பிரச்னையாக இருந்தாலும் சரி, மாதக் கணக்கில் பேசாமல் இருந்தாலும் குழந்தையை விட்டு தந்தை பிரியக் கூடாது.

இரண்டு பக்கமும் பிடிவாதமாக இருந்தால், அது எப்படிப்பட்ட விஷயமாக இருந்தாலும் அதில் பாதிக்கப்படப் போவது குழந்தைதான். ‘உங்களுக்கு என்ன வேணும், நீங்க என்ன நினைக்கிறீங்க’ என்று கணவனும் மனைவியும் நூறு சதவீதம் பொறுமையோடு அமர்ந்து பேசித் தீர்வு காண வேண்டும்.

வீட்டைச் சுற்றியுள்ள சிலர், இதுதான் சமயமென்று ஏற்றி விடுவார்கள். அவர்களால் தம்பதியைச் சேர்த்து வைக்க முடியுமா? உங்கள் குடும்பத்தில் அப்படி எவரேனும் இருப்பின் அவர்களை விலக்குங்கள்.

பத்து நிமிட கோபக் கொந்தளிப்பில் பல்லாண்டு கால வாழ்க்கையை வீணடித்துக் கொள்ளாதீர்கள். சிவாலயத்திலுள்ள சோமாஸ்கந்த மூர்த்திக்கு வியாழக் கிழமைகளில் தொடர்ந்து அர்ச்சனை செய்து வாருங்கள்.

அதைத் தவிர ஏழு சுமங்கலிகளுக்கு புடவை, ரவிக்கை துணி, சீப்பு, கண்ணாடி என்று வைத்துக் கொடுங்கள். வயிறார உணவளித்து அவர்களின் ஆசியை பெற்றுக் கொள்ளச் சொல்லுங்கள். மகள் கணவரோடு ஒற்றுமையாக இருப்பாள்.