எங்களுக்கு மூன்று பெண் குழந்தைகள் உள்ளனர். என் கணவர் ஆட்டோ ஓட்டுகிறார். அதன் மூலம் வரும் வருமானம் எங்களுக்குப் போதவில்லை. எதிர்காலத்தை நினைத்தாலே பயமாக இருக்கிறது. வருமானம் உயரவும், நிம்மதியான வாழ்க்கை அமையவும் என்ன செய்ய வேண்டுமென்று கூறுங்கள்.

தைரியம் என்பது பயமில்லாமல் இருப்பது அல்ல; பிரச்னை என்று வந்தபின் அதை நாம் எப்படி எதிர்கொள்கிறோம் என்பதில்தான் இருக்கிறது. ஒருவன் துறவியாக செய்யும் தவத்தை காட்டிலும், இல்லறத்தில் ஏற்படும் கஷ்ட நஷ்டங்களை எதிர்கொண்டு வாழ்வதுதான் மிகப்பெரிய தவமாக கருதப்படுகிறது.

அதைத்தான் இல்லற தர்மம் என்று உயர்த்திச் சொல்லியிருக்கிறார்கள். வலிகள் இல்லாமல் வெற்றி காண முடியாது. கஷ்டங்கள் அதிகமாகும்போது தெய்வ நம்பிக்கை முழுமையாக இருக்க வேண்டும்.

தேக்குமரம் மாதிரி நிமிர்ந்து நிற்க வேண்டும். சில சமயம் நிறைய பிரச்னைகள் நம்மைச் சூழ்ந்து நிற்பதுபோல நினைப்போம். ‘எனக்கு நிறைய பிரச்னைகள் இருக்கு. ஏன்தான் என் வாழ்க்கை மட்டும் இப்படி இருக்கோ’ என்றெல்லாம் புலம்பத் தோன்றும்.

அதனால் இப்போதைக்கு என்ன வேண்டும் என்று யோசியுங்கள். எப்பொழுதோ நிறைவேறாத ஆசைகளையெல்லாம் மனதில் வைத்துக் கொண்டு, ‘நான் என்ன பாவம் செய்தேனோ’ என்று சொல்லிக் கொண்டிருக்காதீர்கள்.

பெரும் பாலானோரின் பிரச்னையே, மற்றவர்களின் வாழ்க்கையோடு தங்கள் வாழ்க்கையை ஒப்பிட்டுப் பார்ப்பதால் வருவதுதான். இதனால் மனம் குழப்பமடைகிறது. பீதியை அதிகப்படுத்துகிறது. நீங்கள் செய்ய வேண்டிய பரிகாரம் இதுதான்...

பசுஞ்சாணத்தை வாழை இலையில் வைத்துக் கொள்ளுங்கள். லட்சுமி தேவி படத்திற்கு அலங்காரங்கள் செய்து, கீழ்க்கண்ட தேவீ மகாத்மிய ஸ்லோகத்தை 36 முறை படித்து பூக்களால் அர்ச்சியுங்கள்.

ஆறு வெள்ளிக்கிழமைகள் தொடர்ந்து பூஜை செய்யுங்கள். எதிர்காலம் பற்றிய பயம் நீங்கும்; நிம்மதியான வாழ்க்கை அமையும்.

தாரித்ரிய துக்க பய ஹாரிணி! காத்வ தன்யா!
ஸர்வவோபகார கரணாய ஸதார்த்ர சித்தா!