மரக்காணம் கலவரத்தின் போது வாலிபர் மர்மமாக இறந்தது கொலை வழக்காக மாற்றம்

மகாபலிபுரத்தில் கடந்த 25-ந் தேதி பா.ம.க. சார்பில் நடந்த சித்திரை திருவிழாவில் பா.ம.க.வினர் பங்கேற்க சென்றபோது மரக்காணத்தில் பா.ம.க. வினருக்கும் மற்றொரு தரப்பினருக்கும் மோதல் ஏற்பட்டு வன்முறையாக மாறியது.

சம்பவத்தின்போது சித்திரை திருவிழாவில் பங்கேற்க சென்ற அரியலூர் மாவட்டம் வெண்மான் கொண்டான் கிராமத்தை சேர்ந்த பரமசிவத்தின் மகன் செல்வராஜ் (32), தஞ்சாவூரை சேர்ந்த விவேக் ஆகியோர் படுகாயம் அடைந்தனர்.

அவர்கள் உடனடியாக முண்டியம்பாக்கம் அரசு மருத்துவ கல்லூரி ஆஸ்பத்திரியில் சிகிச்சைக்காக சேர்க்கப்பட்டனர். அங்கு தீவிர சிகிச்சை அளித்தும் பலனின்றி இருவரும் இறந்து போனார்கள். இதையடுத்து மரக்காணம் போலீசார் விவேக் விபத்தில் இறந்து போனதாகவும், செல்வராஜ் மர்மசாவு என்றும் வழக்கு பதிவு செய்தனர்.

இதற்கிடையே செல்வராஜின் உடல் மருத்துவ பரிசோதனை அறிக்கை வெளியிடப்பட்டது. அதில் செல்வராஜ் அரிவாளால் வெட்டப்பட்டதில் உயிரிழந்ததாக கூறப்பட்டு இருந்தது. இதையடுத்து மரக்காணம் போலீசார் செல்வராஜ் சாவை கொலை வழக்காக மாற்றி விசாரணை நடத்தி வருகின்றனர்.