‘காமெடி சூப்பர் ஸ்டார்’ ஆன நடிகர் சந்தானம்

தமிழ் சினிமாவில் எல்லா நடிகர்களும் தங்கள் பெயருக்கு முன்னால் அடைமொழியாக பெயரை வைப்பது வழக்கம். அதுபோல் இன்றைய சினிமாவில் நடிக்கும் நடிகர்களின் படங்கள் தியேட்டர்களில் வருகிறதோ, இல்லையோ? அவர்களும் தங்களுக்கென்று ஒரு பெயரை அடைமொழியாக வைத்துக் கொள்கிறார்கள்.

இந்த ஆசை நடிகர்கள் மட்டுமின்றி, நடிகைகள் மற்றும் நகைச்சுவை நடிகர்களையும் விட்டு வைக்கவில்லை. அவர்களும் தங்களுக்காக அடைமொழி பெயரை சூட்டிக் கொள்வதில் பெருமைப்பட்டுக் கொள்கிறார்கள். அந்த வகையில் தமிழ் சினிமாவில் கொடிகட்ட பறந்த வடிவேல் தனது பெயருக்கு முன்னால் ‘வைகைப் புயல்’ என்றும், விவேக் ‘சின்னக் கலைவாணர்’ என்றும் தங்களது பெயருக்கு முன்னால் அடைமொழியாக வைத்துள்ளனர்.

இருப்பினும், தற்போதைய சினிமாவில் எல்லா நடிகர்களின் விருப்பத்துக்குரிய நகைச்சுவை நடிகராக இருக்கும் சந்தானத்திற்கு இதுவரை அடைமொழி இல்லாமல் இருந்து வந்தது. இது அவருக்கு ரொம்பவும் வருத்தமாகவே இருந்தது.

இந்த வருத்தத்தை ‘சேட்டை’ படக்குழு தற்போது நிவர்த்தி செய்து வைத்திருக்கிறது. ‘சேட்டை’ படத்தில் ஆர்யாவுடன் ஜோடி சேர்ந்து சந்தானம் நடித்து வருகிறார். அவருக்கு இப்படக்குழு ‘காமெடி சூப்பர் ஸ்டார்’ என்ற பட்டத்தை சூட்டியுள்ளதாம்.

இதுகுறித்து, சந்தானம் உண்மையான சூப்பர் ஸ்டார் ரஜினிகாந்தை தொடர்புகொண்டு, இப்பெயரை அடைமொழியாக சேர்த்துக்கொள்ள சம்மதம் கேட்டுள்ளார். அதற்கு சூப்பர் ஸ்டாரும் தனக்கே உரித்தான பாணியில் சம்மதம் தெரிவித்துள்ளார்.